“Қизимни ўзбекка бермайман, деганимни нотўғри тушунишган” — Камола Арслонова Ўзбекистонга кўчиб келгани ҳамда туркиялик эрининг стрессга тушгани ҳақида

“Қизимни ўзбекка бермайман, деганимни нотўғри тушунишган” — Камола Арслонова Ўзбекистонга кўчиб келгани ҳамда туркиялик эрининг стрессга тушгани ҳақида

“Келгинди қайнона”, “Киракаш” филмлари ҳамда “Опа-сингиллар” сериалидаги роллари билан томошабинларга яхши таниш бўлган актриса Камола Арслонова “Даракчи”нинг ЁуТубе саҳифасига интервю берди. Суҳбат чоғида актриса туркиялик турмуш ўртоғи билан қандай танишгани, 11 йил давомида хорижда яшаб ватанини соғингани ҳамда оиласи билан Ўзбекистонга бутунлай кўчиб келгани ҳақида сўзлаб берди.

“Эримни биринчи кўрганимдаёқ хаёлимдан шу инсон турмуш ўртоғим бўлади, деган фикр ўтган”

— Авваллари раҳматли онам Истанбулга бориб турардилар. Чет элга илк бор чиқишимга ҳам шу сабаб бўлган. Онамга сюрприз қилиш мақсадида тур сотиб олиб, Туркияга борганман. Ўшанда бу давлатни жуда яхши кўриб қолгандим. Ўзи Туркияга бир марта борган одам яна келишни истайди.

Орадан бироз вақт ўтиб, яна Истанбулга бордим. Бу сафар бошқа ҳудудларни ҳам кўриш мақсадида Измир томонга ўтганимда, турмуш ўртоғим билан тасодифан танишиб қолганмиз. Аввалги интервюларимда айтганманми-йўқми, билмайман, у кишини биринчи кўрганимда хаёлимдан “шу инсон менинг эрим бўлади”, деган ўй ўтган. Илгари ҳеч қачон бундай бўлмаганди, ҳатто ўзим ҳам ҳайрон қолганман.

Бошида иккимизда ҳам оила қуриш нияти бўлмаган. Шунчаки шаҳарни айлантириб, яқинлари билан таништирганлар. Бир-биримизни ёқтириш ёки турмуш қуриш ҳақида гап ҳам кетмаган, шунчаки яхшилик қилган. Тошкентга қайтганимдан кейин у киши менга турмуш қуриш таклифини билдирди. Тўйдан кейин билдим, хўжайиним ҳаммага қўлидан келганча ёрдам беришга интиладиган инсон экан.

“Бу инсондан яхши ота чиқишини ҳис қилганман”

— Санъаткорларда одамларни, атроф-муҳитни кузатиш қобилияти кучли бўлади. Менимча, бу ўзига хос касб касаллиги. Устозим Маҳмуд Рашидов ҳам “театралний” институтда ўқиб юрган пайтларимизда бизни доимий кузатувчанликка ўргатган. Шу сабабли ҳар бир ҳолатга эътибор берардим. Бир сафар турмуш ўртоғимнинг 40 даража иситмаси бўлишига қарамай, ўрнидан туриб ишга кетганини кўриб, ич-ичимдан “қандай масъулиятли инсон, касал бўлса ҳам ишга кетяпти. Ундан жуда яхши ота чиқади”, деб ўйлаганман. Уни танлашимга айнан мана шу хислати сабаб бўлган.

Қолаверса, ўшанда 28 ёшда эдим. Атрофдагилар томонидан “қачон турмушга чиқасан”, деган саволлар тўхтовсиз бериладиган пайтлар эди. Тўғри, унгача ҳам уйланиш ниятида бўлганлар учраган. Лекин улар мени шунчаки актриса ва машҳур бўлганим учун яхши кўришяпти, деган фикрда бўлардим. Шу сабабли бўлажак турмуш ўртоғим билан танишганимизда актрисалигимни яшириб, ўқитувчиман, деб ёлғон гапирганман.

“Онам туркларнинг ҳаммаси ёлғончи бўлади, дегандилар”

— Тошкентга келиб, бор гапни онамга айтдим. Онам бироз муддат Туркияда ишлаб қайтганлари сабабли “болам, туркларга ишонма, уларнинг ҳаммаси ёлғончи бўлади”, дедилар. Нима учундир кўпчилик туркларни алдоқчи деб ўйлайди. Аммо улар ширинсўз, буни инкор этиб бўлмайди. Онам ҳам гапларимни бошида жиддий қабул қилмай индамади, лекин барибир кўнглим ғаш бўлиб қолди.

Кейинчалик хўжайиним билан телефонда ёзишиб турдик. У пайтларда Туркиядан Ўзбекистонга келиш анча қийин, визани кутиш учун уч ой вақт кетарди. Бу ҳақда айтганимдан кейин у киши паспорт тайёрлатди. Ўзбекистонга келиб, яқинларим билан танишиб, қўлимни сўрамоқчи эканини айтди. Аммо уч ойлик муддатни эшитгач “Бунча кутолмайман, хайрли ишни тезроқ битирган маъқул. Мен боролмасам, онангни олиб ўзинг кел”, деди. Йўл чипталарини олиб берганидан сўнг онам билан Туркияга йўл олдик.

Борганимиздан кейин уйдагилари, онаси билан таништирди, онам билан суҳбатлашишди. Ўша кеча онам менга “йўқ, қизим”, дедилар. Ўшанда онамнинг гапи учун роса йиғлагим келган. Аслида қаттиқ севиб-ошиқ бўлмагандим, лекин кўнглим қандайдир “жиз” этганди. “Майли, сиз нима десангиз шу”, деганимда, онам йиғлаётганимни пайқаб қолди. Эрталаб уйғонгач эса хайрли туш кўрганини айтиб, розилик берди.

“Туркияда яшашга кўника олмадим”

— Онамнинг “масофа узоқ, қийналасан”, деган гапларида жон бор экан. Буни 11 йил давомида хорижда яшаб тушундим. Ўзбекистонга ҳар келганимда ортга қийналиб, ватанни соғиниб қайтардим. Кўпчилик ижтимоий тармоқларда менга “ватанфуруш, юртингни сотиб кетдинг”, деб ёзади. Аммо мен аввалги интервюларимда ҳам ватан соғинчи ҳақида доим гапирганман. Шунинг учун охири 11 йиллик дуоларим ижобат бўлиб, оиламиз билан Ўзбекистонга қайтиб келдик.

“Ниятда гап катта экан”

— Яратгандан кўчиб келишимизни 11 йил давомида сўрадим. Ниятингиз амалга ошиши бошқача ёқимли бўларкан, чунки бу мен учун ушалмас орзудек эди. Турмуш ўртоғимнинг иши, дўстлари ва барча танишлари у ёқда бўлгани сабабли ҳаммасини ташлаб кетиш осон эмасди.

Бир-икки марта кўчиб кетиш ҳақида гапирганимда “барча яқинларим, ишим ва обрўйим Туркияда”, деб айтганди. Ҳақиқатан ҳам у ерда ўз бизнеси бор эди ва уни кўпчилик танирди. Худди мен Ўзбекистонда танилганимдек, у ҳам ватанида машҳур эди. Шу боис “бу обрўдан, фамилиямдан болаларим ҳам фойдаланиши керак”, деб кўчишга рози бўлмасди.

Қаршиликларга қарамай, барибир ватанимга қайтишимизни сўраб дуо қилаверардим. Истагингизга етишгандан кейин эса барибир ҳамма нарсанинг ўз масъулияти борлигини тушуниб, “тўғри қилдиммикин”, деб бироз қўрқиб ҳам қолар экансиз.

“Бу ерда турмуш ўртоғим уч ёшли болага айланиб қолди”

— Ўзи очиқ айтмаса ҳам, Ўзбекистонга кўчиш турмуш ўртоғимни бироз қўрқитгани рост. Янги муҳит барибир ўзига яраша стрессли бўлди. Тилимизни билмагани сабабли ўзини гўё уч ёшли боладек ҳис қилаётганини айтади. Бир сафар дўконга борганида сотувчи уни тушунмай, “эртага келинг”, деб жўнатиб юборибди. Шундан кейин нима кераклигини қўлига ёзиб берадиган бўлдим. Келган кунларимизнинг бошида кечалари ухлолмай чиқарди, ҳозир эса бироз кўникди.

Фарзандларимиздан қизимнинг бу ерга мослашиши бошида бироз қийин кечди. Ўғлимга эса фарқи йўқ, унинг учун ёнида бўлишимизнинг ўзи етарли. Болалар Ўзбекистонга тезроқ ўргансин ва бу ерни яхши кўриб қолсин деб, уларни ҳар куни ҳайвонот боғи ҳамда истироҳат боғларига олиб борардим. Худога шукр, улар ҳам тезда кўникиб кетишди.

“Ишсиз қолганим сабабли стрессга тушдим”

Актрисанинг турмуш ўртоғи янги манзилда бошдан ўтказганларини шундай изоҳлайди:

— Ҳар доим ишимни ўзим мустақил бажаришга одатланганман. Нимани режа қилсам, эрталабми-кечқурун, бунинг фарқи йўқ, ўша куннинг ўзида амалга оширишим лозим эди. Ўзбекистонга келгач эса бу имкониятдан чекландим. Эркин ҳаракат қилолмайман, тил билмаганим учун бирон ишни мустақил битира олмайман. Шу сабабли ҳам қаттиқ стрессга тушдим, дейди актрисанинг туркиялик турмуш ўртоғи.

“Қизимни ўзбек йигитига турмушга бермайман, деганимни нотўғри тушунишган”

— Бир пайтлар Туркияда ватанимни соғиниб, зерикканим сабабли ижтимоий тармоқларда фаол бўлиб, блог юритишни бошлагандим. Ўшанда бир сафар “қизимни ҳеч қачон ўзбекка бермайман”, деб ёзган гапимни кўпчилик нотўғри тушунган. У вақтлар кейинчалик бутунлай Ўзбекистонга кўчиб келишимизни билмаганман. Бу ёзув тарқалиб кетгач, кўпчилик “у бизнинг эркакларимизни менсимаяпти”, деб тушунди. Ваҳоланки, мен буни бутунлай бошқа маънода ёзгандим.

Аксинча, ўзим мусофирликда қийналганим сабабли келажакда қизим ҳам чет элга турмушга чиқиб, менга ўхшаб ватанини соғиниб яшамасин, деган мақсадда айтганман. Чунки оиладан узоқда яшаш, ҳақиқатан, қийин. Буни бошимдан ўтказганим учун яхши биламан. У ёқда ҳар доим “онам нима қиляпти экан, соғлиқлари яхшими?”, деган ўй билан яшардим.

Қолаверса, опам Қозоғистонда, яна бир опам бошқа давлатда, укам эса Москвада. Ҳаммамиз четда бўлганимиз сабабли мусофирлик нима эканини биламиз. Шунинг учун қизимнинг ҳам юрт соғинчида қийналишини истамаганман.

“Ижодни соғинганман”

— Болалигимдан касбимни, саҳнани яхши кўраман ва ҳозир ижодни жуда соғинганман. Агар яхши филмлардан ўзимга мос ролларга таклифлар бўлса, жон деб қабул қилардим.

Инстаграм орқали ижодга қайтишни ҳам ўйлаяпман. Аммо нимадан, қандай бошлашни ҳозирча билмаяпман. Буни кимдан сўрашни ҳам билмайман. Мен таниган, билган ҳамкасбларим эса театрда, улар блог юритмайди. Ҳозирги блогерлар билан эса таниш эмасман, дейди актриса.