“Путин билан Туркияда учрашишга тайёрман” — Зеленский
Украина президенти Эрдўғон билан учрашувда Россия етакчиси иштирокида уч томонлама саммит ўтказишни, Қора денгиз хавфсизлигини ва бошқа масалаларни муҳокама қилди.
“Путин билан Туркияда учрашишга тайёрман” — Зеленский
Украина президенти Владимир Зеленский россиялик ҳамкасби Владимир Путин билан Туркияда учрашишга тайёр эканини айтди. Бу ҳақда у СНН Турк телеканалига берган интервюсида маълум қилди.
Зеленский Туркия президенти Ражаб Тоййиб Эрдўғоннинг таклифига кўра 31-октябр куни Истанбулга борди. Бу икки етакчининг сўнгги тўрт ой ичидаги учинчи юзма-юз учрашуви бўлди. Музокараларда Туркияда уч томонлама учрашув ўтказиш масаласи ҳам муҳокама қилинди. Зеленский бундай ташаббусни қўллаб-қувватлашини, агар Анқара уни амалга ошира олса, бундан фақат мамнун бўлишини билдирди.
“Россия билан уруш якунланиши керак. Туркиянинг воситачилик қилишига умид қиламан. Путин билан Туркияда учрашишга тайёрман”, деди у.
### Энергетика бўйича сулҳ ва Қора денгиз хавфсизлиги
Зеленский туркиялик ҳамкасби билан учрашувда қиш яқинлашаётгани ва Россиянинг баллистик ракета ҳужумлари давом этаётгани сабабли энергетик сулҳ масаласини кўтарган. Томонлар, шунингдек, озиқ-овқат хавфсизлиги, Қора денгизда кемалар қатновини хавфсиз ташкил этиш ва савдони эркинлаштириш масалаларини ҳам муҳокама қилган.
Украина президенти 2022-йилда Қора денгизда дон йўлагини йўлга қўйишда Эрдўғоннинг ролини алоҳида таъкидлади. Россия Украина портларини блокада қилган пайтда ушбу келишув ғаллани Африка ва озиқ-овқатга муҳтож бошқа давлатларга етказиш имконини берган.
### Украинасиз унинг тақдирини ҳал қилиб бўлмайди
Зеленский интервюда тинчлик бўйича ҳар қандай музокарада Украина иштироки бўлиши шартлигини айтди.
“Украинасиз унинг тақдирини ҳал қилиб бўлмайди. Суверенитетимиз ва ҳудудий яхлитлигимизни ҳам Украинасиз муҳокама қилиш мумкин эмас. Кўплаб етакчилар аввал ҳам Украина тақдирини бизсиз ҳал қилишга уринган, бироқ ҳеч бири натижа бермаган. Келишувга эришиш учун уришаётган томонларнинг ўзи музокара столида бўлиши керак”, деди у.
Шунингдек, Зеленский Россия Украинани уч кун ичида эгаллаб олишни режалаштирган бўлса-да, қарийб беш йилдан бери бу мақсадига эриша олмаганини таъкидлади.