Трамп ва Зеленский Ню Ёркда учрашди. Украина президенти энергетика сулҳига тайёр
Трамп ва Зеленский Ню-Ёркда учрашди. Украина президенти энергетика сулҳига тайёр
Украина президенти Владимир Зеленский ва АҚШ президенти Доналд Трамп 22-сентябр куни Ню-Ёркда музокара ўтказди.
Учрашувдан олдин икки президент журналистлар саволларига жавоб берди. Улар Россия ва Украина ўртасидаги энергетика сулҳи, АҚШнинг Россияга қарши “жаҳаннам санксиялари”, шунингдек, урушни якунлаш учун эҳтимолий уч томонлама музокаралар ҳақида сўз юритди. Зеленский Россия билан урушни қишгача тўхтатиш мумкинлигини айтди.
“Умид қиламанки, биз бу урушни тугатамиз ва президент Трамп бизга бу борада ёрдам беради. Менимча, буни имкон қадар тезроқ қишгача амалга ошириш зарур”, деди Украина раҳбари.
Учрашув трансляцияси Украина президенти идорасининг ЁуТубе каналида эълон қилинди. Трамп эса ўз навбатида Москва ва Киев келишувга эришишини таъкидлади.
“Бу қандай келишув эканини айтмоқчи эмасман. Биз бу ҳақда кўп гаплашамиз, жумладан, (Россия президенти Владимир) Путин билан ҳам”, деди Америка етакчиси.
Журналистлар Трампдан Россия раҳбари декабр ойида Маямида бўлиб ўтадиган Г20 саммити доирасида у ва Зеленский билан учрашиш ҳақидаги таклифни қабул қиладими, деб сўради.
“Билмайман. У учрашишини биламан, биз Аляскада аллақачон учрашганмиз. Менимча, у яна бир учрашув ўтказишга рози бўларди. Аммо Маями масаласида ишончим комил эмас”, деди Трамп.
У можаронинг тугашини Путин ҳам, Зеленский ҳам хоҳлаётганини маълум қилди. Таъкидланишича, Трамп ушбу учрашувдан олдин Украинани Россиядаги нефтни қайта ишлаш заводларига берган зарбалари учун танқид қилган. У бу ҳужумлар дунёда дизел ёнилғиси нархининг ошишига жиддий таъсир кўрсатганини айтган.
Зеленский учрашувда Россия билан энергетика соҳасида сулҳ тузишга тайёрлигини, бироқ бунга иккала томон ҳам амал қилиши кераклигини айтди. Трамп ҳам энергетик сулҳни бир томонлама жорий этишни сўрамаганини билдирди. АҚШ президенти аввалроқ Зеленскийдан Россиядаги нефт обьектларига ҳужумларни тўхтатишни икки марта сўраганди.
Украина ва АҚШ президентларининг ёпиқ музокаралари 40 дақиқа давом этди. Трамп иккинчи муддатга қайта сайланганидан сўнг АҚШ Россия ва Украина ўртасидаги музокараларда воситачи бўлди. Бу жараён 2026-йил бошида АҚШнинг Эронга қарши уруши фонида тўхтаб қолди. Бироқ август ойида Вашингтон воситачилик саъй-ҳаракатларини қайта бошлади.
АҚШ Марказий разведка бошқармаси директори Жон Ретклифф, шунингдек, Трампнинг махсус вакиллари Жаред Кушнер ва Стив Уиткофф Москвага ташриф буюрди, сўнгра Киевда Зеленский билан ҳам учрашди. Томонлар энергетика обьектларига зарба беришни ўзаро тўхтатиш масаласини муҳокама қилмоқда. Ҳозирча АҚШ иштирокидаги музокаралар аниқ келишув билан якунланмаган.