Путин Арманистонни ЕИ ва ЕОИИ ўртасида танлов қилишга чақирди
Россия президенти Владимир Путин Арманистоннинг Европа Иттифоқига аъзо бўлиш жараёнини бошлаши амалда Евросиё иқтисодий иттифоқидан чиқишни англатишини билдирди. Арманистон бош вазири Никол Пашинян эса Ереван ЕОИИ доирасидаги мажбуриятларини бузмаганини таъкидлади.
Путин Арманистонни Европа Иттифоқи (ЙИ) ва Евросиё Иқтисодий Иттифоқи (ЕОИИ) ўртасида танлов қилишга ундади.
Россия президенти Владимир Путин ва Арманистон бош вазири Никол Пашинян Бишкекда Шанхай Ҳамкорлик Ташкилоти саммити доирасида учрашишди. Кремлнинг 1-сентабр куни эълон қилинган музокаралар стенограммасига кўра, Арманистоннинг Европа Иттифоқига аъзо бўлиш режалари асосий муҳокама мавзуларидан бири бўлган.
Путин Арманистоннинг бошқа иқтисодий тузилмага қўшилиш жараёнини бошлаши ЕОИИдан чиқишни англатишини таъкидлади, чунки бир вақтнинг ўзида иккала тузилмага ҳам аъзо бўлиш имконсиз.
"Сиз чиқиш ҳақида эълон қилмаганингизни айтдингиз. Бошқа иқтисодий ташкилотга аъзо бўлиш жараёнини бошлаш тўғрисидаги қонуннинг қабул қилиниши амалда бизнинг ташкилотдан чиқиш ҳақидаги баёнотни англатади. Чунки у ерда ҳам, бу ерда ҳам бир вақтнинг ўзида бўлиш мумкин эмас", деди Путин.
Россия президенти Арманистонда ЙИ ва ЕОИИ масаласи бўйича референдум ўтказиш таклифини яна бир бор илгари суриб, бу борада аҳолининг фикрини сўраш зарурлигини таъкидлади.
Пашинян эса Арманистон Россия билан икки томонлама шартномаларни ҳамда ЕОИИ доирасидаги ҳуқуқий базани таҳлил қилганини билдирди. Унинг сўзларига кўра, Ереван Арманистоннинг Россия ёки ЕОИИ олдидаги мажбуриятларини бузган бирор ҳолатни аниқламаган.
Пашинян, шунингдек, 2025-йилда Европа интеграциясига оид қонун қабул қилиниши билан Арманистон ЙИ ва ЕОИИ ўртасида танлов қилиш бўйича референдум ўтказиш ғоясидан амалда воз кечганини айтди.
Арманистон бош вазири 24-август куни мамлакат яқин вақт ичида Европа Иттифоқига аъзо бўлиш учун ариза бериш жараёнини бошлаш ниятида эканини маълум қилган эди. Шундан сўнг Европа комиссияси Арманистон ҳозир "Европа Иттифоқига ҳар қачонгидан ҳам яқинроқ" эканини билдирган. Бироқ Брюссел ЙИга аъзо бўлиш аниқ белгиланган ва номзод мамлакатнинг натижаларига асосланган жараён эканини ҳам эслатган.
Путин аввал ҳам Европа Иттифоқи ва Евросиё Иқтисодий Иттифоқига бир вақтнинг ўзида аъзо бўлиш мумкин эмаслигини таъкидлаб келган.
Россия ва Арманистон ўртасидаги муносабатларда сўнгги вақтларда келишмовчиликлар кузатилмоқда. ДВ маълумотига кўра, Арманистондаги парламент сайловлари арафасида Москва айрим арман маҳсулотларининг Россияга олиб кирилишини тақиқлаган.