Ўзбекистонликлар учун Мисрга киришнинг янги қоидалари 2027-йил мартгача қолдирилди
Ўзбекистонликлар учун Мисрга кириш талабларини қатъийлаштириш муддати музокаралар туфайли 2027-йил 1-мартгача кечиктирилди. Бу муддатгача сайёҳлар Шарм-ал-Шайх ва Синай яриморолига виза олмасдан, амалдаги тартибда саёҳат қилишда давом эта олади.
Ўзбекистон фуқаролари учун Мисрга кириш бўйича янги қоидалар 2027-йил мартигача кечиктирилди
Ўзбекистон фуқароларининг Мисрга киришига доир янги тартибларни жорий этиш муддати 2027-йил 1-мартга қадар сурилди. Бу ҳақда Ўзбекистон Ташқи ишлар вазирлиги матбуот хизмати маълум қилмоқда.
Қайд этилишича, ТИВ ва Ўзбекистоннинг Қоҳирадаги элчихонаси томонидан Миср томони билан бевосита олиб борилган музокаралар натижасида Ўзбекистон фуқароларининг ушбу ҳудудга кириш тартибини қатъийлаштириш бўйича аввал қабул қилинган қарорни қайта кўриб чиқиш юзасидан келишувга эришилган.
Шу тариқа, янги қоидалар кучга киргунига қадар фуқаролар Мисрга амалдаги тартиб асосида сафар қилишлари мумкин.
Шу билан бирга, Ўзбекистон ТИВ хорижий ҳамкорлар билан фуқароларнинг чет элга сафар қилиш имкониятларини кенгайтириш, визасиз режимларни жорий этиш ҳамда бошқа хорижий давлатлар билан мавжуд сафар тартиб-таомилларини соддалаштириш борасида изчил ишларни давом эттирмоқда, дейилади хабарда.
Ўз навбатида, фуқаролар хорижий давлатларга сафар қилаётганда маҳаллий қонунчилик ва белгиланган тартиб-қоидаларга қатъий риоя этиш, виза ва миграция талабларини бажариш, шунингдек, борилаётган мамлакатнинг миллий қадриятлари, анъаналари ва жамоат тартибини ҳурмат қилишга чақирилди.
“Ҳар бир фуқаронинг хорижда масъулиятли хулқ-атвор намоён этиши Ўзбекистоннинг ижобий имижини мустаҳкамлаш ва мамлакатимизнинг халқаро ҳамкорлигини янада ривожлантиришга хизмат қилади”, — дейилади идора хабарида.