Ўзбекистон ва Жанубий Корея сунъий интеллект, транспорт ва таълим соҳаларида ҳужжатларни қабул қилди

Ўзбекистон ва Жанубий Корея сунъий интеллект, транспорт ҳамда таълим йўналишларида ҳужжатлар қабул қилди

Шавкат Мирзиёев ва Жанубий Корея президенти Ли Же Мёнг иштирокида икки томонлама ҳужжатлар алмашинуви маросими ўтказилди. Бу ҳақда президент матбуот хизмати маълум қилди.

Тўпламга савдо-иқтисодий, инвестициявий, гуманитар ва бошқа соҳалардаги шерикликни янада кенгайтириш ва мустаҳкамлашга қаратилган шартнома ҳамда битимлар киритилди.

Ҳужжатлар транспорт, авиация, қишлоқ хўжалиги, туризм, сунъий интеллект, техник кўмак, олий, мактаб ва мактабгача таълим соҳаларидаги ҳамкорликни қамраб олади.

Шунингдек, тиббий маҳсулотларни тартибга солиш, атроф-муҳитни муҳофаза қилиш, иқлим ўзгаришига қарши курашиш, интеллектуал мулкни ҳимоя қилиш, архив иши ва бошқа йўналишларда ҳам ҳужжатлар қабул қилинди.

Аввалроқ Шавкат Мирзиёев Жанубий Корея билан иқтисодий ҳамкорликнинг бешта устувор йўналишини белгилагани ҳақида хабар берилганди.