Оқ уй АҚШ Канаданинг баъзи товарларига қўйилган тарифларни бекор қилаётганини маълум қилди
Келаси ойдаги сайловларда сенатдаги ўрнини сақлаб қолиш учун кескин кураш олиб бораётган республикачи Сузан Коллинз тарифларни енгиллатиш бўйича Оқ уй билан ҳамкорлик қилаётганини айтди.
Оқ уй АҚШ Канаданинг баъзи товарларига қўйилган тарифларни бекор қилаётганини маълум қилди
Сенатор Сюзан Коллинз «тарифларни енгиллаштириш»га эришиш учун администрация билан бирга ишлаганини айтди
АҚШ Канада товарларига жорий этилган 50 фоизлик тарифларнинг бир қисмини олиб ташламоқда. Оқ уй жума куни бу қарор «Америка халқининг иқтисодий фаровонлиги ва миллий хавфсизлигини ҳимоя қилиш» мақсадида қабул қилинганини билдирди.
Ушбу имтиёзлар 3 ноябрдаги оралиқ сайловларда республикачи номзодларнинг имкониятларини ошириши ҳам мумкин, чунки кўплаб америкалик сайловчилар нархларнинг ҳамёнбоплиги ва иқтисодий қийинчиликларни ўзларининг энг катта ташвишлари қаторига қўйишмоқда.
Сайловда ўз ўрнини сақлаб қолиш учун Мэн штатида шиддатли кураш олиб бораётган республикачи сенатор Сюзан Коллинз биринчилардан бўлиб бу имтиёзларни эълон қилди ва улар штатининг қишлоқ хўжалиги соҳасини қўллаб-қувватлашини айтди.
Шу ёзда савдо музокаралари барбод бўлганидан сўнг, АҚШ ва Канада чегаранинг иккала томонига ҳам зарба берган тарифлар урушини авж олдирди.
Оқ уй ўз баёнотида АҚШ Канададан солиқ солинадиган товарлар рўйхатидан баъзи маҳсулотларни, жумладан, фанера варақлари, баъзи қоғоз маҳсулотлари, муайян машина ва совутиш ускуналари, шунингдек, баъзи қадоқлаш яшиклари ва қутиларини чиқариб ташлаётганини маълум қилди.
Ушбу маҳсулотлар ўрнига баъзи клапанлар, гиламлар, чиқинди маҳсулотлари ва бошқалар киритилиши қўшимча қилинди.
Шунингдек жума куни, Президент Дональд Трамп Канада АҚШ билан савдо битими бўйича «жуда қаттиқ ишлаётганини» айтди.
The Wall Street Journal нашрининг хабар қилишича, асосан Канада қишлоқ ва ўрмон хўжалигига қаратилган бу имтиёзлар бўлажак оралиқ сайловларда Коллинз ва бошқа республикачиларга ёрдам бериш мақсадида жорий этилган.
Тарифларнинг қисқартирилиши Канаданинг бошқа товарларига божларни ошириш орқали мувозанатланиши мумкин, деб хабар берди Journal.
Ушбу хабардан сўнг Коллинз томонидан эълон қилинган баёнотда, олтaнчи муддатга ўз номзодини кўрсатаётган амалдаги қонунчи тўққизта маҳсулот категорияси, жумладан черника, картошка, олма ва денгиз ўтлари ишлаб чиқарувчилари АҚШнинг Канадага қарши тарифларидан озод қилинишини айтди.
«Фермер ва деҳқонларимизнинг кўпчилиги Канададан келтириладиган махсус ускуналар, қадоқлаш материаллари ва бошқа маҳсулотларга таянади, уларни эса Америка етказиб берувчиларидан топиб бўлмайди ёки катта харажатларсиз алмаштиришнинг иложи йўқ», — деди у X (собиқ Twitter) тармоғида.
Коллинз АҚШ расмийлари ва администрациянинг юқори лавозимли шахсларидан вазиятни янада енгиллаштиришни ва Канада билан кенгроқ савдо битимини илгари суришни сўраганини айтди.
Мэн штати иқтисодиёти, бошқа чегарадош штатлар сингари, Канада билан чамбарчас боғлиқ ва бир ойлик савдо урушининг таъсирини ҳис қилди.
Мичиганлик қонунчи Майк Рожерс ҳам республикачи бўлиб, бир неча ой давомида ушбу сиёсатни қўллаб-қувватлаганидан сўнг, савдога қарам бўлган ўз штатида Трампни ушбу қарама-қаршиликни тугатишга чақирувчи рекламаларни жойлаштирди.
Нью-Ҳэмпширда собиқ сенатор Жон Сунуну ҳам жавоб тариқасидаги тарифларни танқид қилди.