Олтин, машина, минерал ёқилғи: Ўзбекистон хорижга нималар экспорт қилмоқда?
Йил бошидан буён Ўзбекистон экспорти 22,9 млрд долларни ташкил этган. Унинг энг катта қисми хизматлар
Олтин, машина, минерал ёқилғи: Ўзбекистон хорижга нималарни экспорт қилмоқда?
Миллий статистика қўмитаси маълумотига кўра, 2026-йил январ–август ойларида Ўзбекистоннинг жами экспорт ҳажми 22 млрд 866,9 млн долларни ташкил этган. Бу 2025-йилнинг шу давридаги 23 млрд 661,7 млн долларга нисбатан 3,4 фоизга кам.
Шу билан бирга, экспорт таркибида хизматлар ҳажми сезиларли даражада ошган. Январ–август ойларида 8 млрд 542,9 млн долларлик хизматлар экспорт қилинган. Бу бир йил ичида 33,8 фоизлик ўсиш бўлиб, умумий экспортдаги улуши 37,4 фоизга етган. 2025-йилда бу кўрсаткич 27 фоиз бўлган.
Саноат товарлари экспорти 3 млрд 359,9 млн долларни ташкил этиб, 25,6 фоизга ошган. Уларнинг жами экспортдаги улуши 14,7 фоизга чиққан.
Турли тайёр буюмлар экспорти 2 млрд 92 млн долларга етган. Бу 2025-йилнинг мос даврига қараганда 88,1 фоиз кўп бўлиб, умумий экспортдаги улуши 9,1 фоизни ташкил қилган.
Кимёвий воситалар ва шунга ўхшаш маҳсулотлар экспорти 1 млрд 775,1 млн доллар бўлган. Ушбу йўналишда ўсиш 32,3 фоизни ташкил этган, улуши эса 7,8 фоизга етган.
Озиқ-овқат маҳсулотлари ва тирик ҳайвонлар экспорти 1 млрд 786,2 млн долларни, минерал ёқилғи ва шунга ўхшаш материаллар экспорти эса 1 млрд 56,9 млн долларни ташкил этган.
Экспортда бошқа товарлар ҳажми 2 млрд 863,3 млн доллар бўлган. Бу 2025-йилга нисбатан 65,8 фоизга камайган. Унинг умумий экспортдаги улуши 12,5 фоизни ташкил этган.
Жумладан, монетар бўлмаган олтин экспорти 2 млрд 803,8 млн долларни ташкил этган. У бир йил ичида 66,3 фоизга қисқарган ва жами экспортдаги улуши 12,3 фоизга тушган.
Машина ва транспорт асбоб-ускуналари экспорти 899,8 млн долларга, минерал ёқилғидан ташқари хом ашё экспорти 230,1 млн долларга, ичимликлар ва тамаки маҳсулотлари экспорти 176,2 млн долларга етган. Овқат ва ўсимлик ёғлари экспорти эса 84,7 млн доллар бўлиб, бу 2025-йилга нисбатан 2,1 баробар кўп.