Ўзбекистон хориждан кўпроқ нималар импорт қилмоқда?
7 ой мобайнида Ўзбекистон 29,6 млрд долларлик импорт қилди, унинг энг катта қисми машиналар ва
Ўзбекистон хориждан энг кўп нималарни олиб келмоқда?
Миллий статистика қўмитаси маълумотларига кўра, 2026-йил январ–июл ойларида Ўзбекистон импорти 29,6 млрд АҚШ долларига етган. Бу кўрсаткич 2025-йилнинг шу даврига нисбатан 17,8 фоизга юқори.
Импорт таркибида энг катта улуш машина ва транспорт асбоб-ускуналарига тўғри келган — 9,7 млрд доллар. Бу умумий импортнинг қарийб учдан бир қисмини ташкил этади. Мазкур йўналишда ўсиш 20 фоиз бўлган.
Саноат товарлари импорти 4,4 млрд долларни, хизматлар импорти 3,6 млрд долларни ташкил этган. Кимёвий воситалар ва шунга ўхшаш маҳсулотлар импорти ҳам 3,6 млрд долларга тенг бўлган.
Озиқ-овқат маҳсулотлари ва тирик ҳайвонлар импорти 3,3 млрд долларга етган. Бу йўналишда ўсиш 41,9 фоизни ташкил этиб, келтирилган таркиб ичида энг юқори ўсиш суръати қайд этилган.
Минерал ёқилғи, мойлаш материаллари ва шунга ўхшаш материаллар импорти 2,5 млрд доллар бўлган. Ушбу кўрсаткич йиллик таққослашда 10,7 фоизга ошган.
Турли хил тайёр буюмлар импорти 1 млрд долларга етиб, 14 фоизга ўсган. Ёқилғидан ташқари ноозиқ-овқат хомашёси импорти 909,8 млн долларни ташкил қилган.
Ҳайвон ва ўсимлик мойлари, ёғлар ва мумлар импорти 363 млн доллар бўлган. Бу ўтган йилнинг мос даврига нисбатан 25,3 фоизга кўп.
Ичимликлар ва тамаки маҳсулотлари импорти эса 222,2 млн долларни ташкил этган. Ушбу йўналишда 15,3 фоизлик ўсиш қайд этилган.