Обид Ҳакимов таълимни ислоҳ қилиш бўйича ПА раҳбарининг ўринбосари бўлди
Президентнинг иқтисодий сиёсат бўйича маслаҳатчиси Обид Ҳакимов Президент Администрацияси раҳбарининг таълим ислоҳоти бўйича ўринбосари ва ўриндошлик асосида «Янги Ўзбекистон» университети ректори этиб тайинланди. Камолиддин Мардонов иқтисодий сиёсат бўйича янги маслаҳатчи бўлди.
Обид Хакимов таълимни ислоҳ қилиш бўйича Президент Администрацияси раҳбари ўринбосари этиб тайинланди
Обид Арзиқулович Хакимов Президент Администрацияси раҳбарининг таълимни ислоҳ қилиш масалалари бўйича ўринбосари ва ўриндошлик асосида «Янги Ўзбекистон» университети ректори лавозимига тайинланди. Бу ҳақда Президент матбуот котиби Шерзод Асадов маълум қилди.
Бунгача — 2025 йил октябрь ойидан бошлаб — у давлат раҳбарининг иқтисодий сиёсат масалалари бўйича маслаҳатчиси лавозимида ишлаб келаётган эди, ундан аввал эса иқтисодий сиёсат масалалари бўйича маслаҳатчи ўринбосари — Иқтисодий тадқиқотлар ва ислоҳотлар маркази директори бўлган.
Камолиддин Карамиддинович Мардонов илгари Президент Администрацияси Ҳуқуқий экспертиза ва комплекс таҳлил департаменти бошлиғининг биринчи ўринбосари лавозимида ишлаган.
Бундан аввалроқ, Президент фармони билан Мактабгача ва мактаб таълими вазирлиги ҳамда Олий таълим, фан ва инновациялар вазирлиги ягона Таълим ва фан вазирлиги этиб бирлаштирилгани хабар қилинган эди.