Президент «Янги Ўзбекистон» университетига ташриф буюрди
Шавкат Мирзиёев университетда узлуксиз таълим ислоҳотлари тақдимотини кўздан кечириб, талабалар учун яратилган замонавий илмий ва
Президент «Янги Ўзбекистон» университетига борди
Президент Шавкат Мирзиёев Ўқитувчи ва мураббийлар куни арафасида «Янги Ўзбекистон» университетига ташриф буюриб, таълим соҳасидаги ислоҳотлар ҳамда келгусидаги режалар ҳақида тайёрланган кўргазма билан танишди.
Аввал таълимнинг узвийлигини таъминлаш йўлида амалга оширилаётган ишлар, эришилган натижалар ва белгиланган режалар тақдим этилди. «Мактабгача таълим», «Мактаб таълими», «Иқтидорли мактаб ўқувчилари», «Профессионал таълим» ва «Олий таълим» павилонларида таълимнинг турли босқичларидаги ислоҳотлар намойиш қилинди.
Тақдимотда боланинг илк ёшидан бошлаб касб эгаллашигача бўлган таълим жараёнида юз бераётган ўзгаришлар акс эттирилди.
Президент университетнинг ўқув ва илмий инфратузилмаси билан ҳам танишди. «Келажак муҳандислари» майдони, «Блоомберг» лабораторияси, физика ўқув лабораторияси, муҳандислик фанлари ўқув зали ва «Аппле Траининг Сентер»да талабалар учун яратилган имкониятлар ҳақида маълумот берилди.
Шунингдек, «Идроск» сунъий интеллект кластери, биотехнология ва биоинформатика лабораторияси, материалшунослик, лазер ва нанотехнологиялар ҳамда «АДМ» машинасозлик лабораториялари фаолияти намойиш этилди.
Мазкур инфратузилмалар талабаларнинг назарий билимларини амалий машғулотлар, илмий тадқиқотлар ва лойиҳалар билан боғлашга хизмат қилади.
Ташриф давомида давлат раҳбари университет профессор-ўқитувчилари, талабалари ҳамда халқаро таълим дастурларини жорий этишда ҳамкорлик қилаётган хорижий ҳамкорлар билан суҳбатлашди.
Учрашувларда таълим соҳасидаги ислоҳотлар ва замонавий ўқув муҳитини ривожлантириш масалалари муҳокама қилинди. Президент, шунингдек, фаол ва ташаббускор ўқитувчи ҳамда мураббийлар билан эсдалик учун суратга тушди.
Таълим соҳасидаги ислоҳотларнинг кейинги босқичида замонавий кўникмалар, ахборот технологиялари ва мустақил фикрлашга эътибор кучайтирилаётгани расмий тақдимотларда ҳам қайд этилди.