Норозиликдан сўнг Call of Duty ўйинидан Сеулдаги тиқилинч саҳнаси олиб ташланадиган бўлди
Яқинларини йўқотган оилалар «Modern Warfare 4» ўйинига Итхэвондаги фожиа тасвирлари киритилганини кўриб, даҳшатга тушганликларини айтмоқдалар.
Сеулдаги тиқилинч кадрлари танқидлардан сўнг Call of Duty ўйинидан олиб ташланади
Modern Warfare 4 ўйинчиларни Шимолий ва Жанубий Корея ўртасидаги низо ичига жойлаштиради
Сеулдаги фожиали тиқилинч оқибатлари тасвирланган видеолавҳалар жабрланганларнинг оилалари томонидан билдирилган кескин эътирозлардан сўнг Call of Duty’нинг энг янги ўйинидан олиб ташланади.
Қарийб 160 кишининг ёстиғини қуритган 2022 йилги офатнинг реал янгиликлар лавҳалари Modern Warfare 4’нинг очилиш саҳнасида Шимолий Кореянинг тўқима босқинини тасвирлаш учун ишлатилган эди.
Яқинларидан айрилган қариндошлар одамларнинг замбилларда олиб кетилаётгани, кўчадаги мурда қоплари ва жонлантиришга бўлган уринишлар тасвирланган бу материал ўйин учун қайта ишлатилганини кўриб "ҳайратда қолганларини" айтишди.
Call of Duty ортида турган Activision компанияси эндиликда бу кадрлар ўйиннинг навбатдаги янгиланишида олиб ташланишини маълум қилди.
Тиқилинч тўрт йил муқаддам Сеулнинг Итхэвон туманидаги тор кўчаларда, 100 000 дан ортиқ одам Ҳэллоуинни нишонлаш учун тўпланганида содир бўлган эди.
Кўчалар шунчалик гавжум бўлиб кетганки, одамлар ҳаракатлана олишмаган, баъзилари эса нафас оломай қолган.
Пайшанба куни эълон қилинган баёнотда ҳалок бўлганларнинг оилалари бу офат "юзлаб одамларнинг жабрланишига олиб келган фожиа бўлганини ҳамда қутқарувда қатнашган ёки бунга гувоҳ бўлган фуқаролар шу кунгача травмадан азият чекиб келаётганини" билдиришди.
"Воқеа жойидаги кўплаб фуқаролар бир-бирини қутқариш учун сунъий нафас берган, жабрланганлар эса муздек кўчада ётган ўша тартибсиз ва умидсиз саҳнанинг ўйиндаги саҳнани яратиш учун ишлатилганидан ҳайратда қолмай иложимиз йўқ.
Бундай воқеадан кўнгилочар мақсадда яратилган ўйин учун материал сифатида фойдаланишнинг ўзи ўта ноўрин ва маъносиздир".
Астивисион компанияси "ўйиннинг тўқима сюжетини яратиш" учун офатнинг реал янгиликлар лавҳаларидан фойдаланганини айтиб, лекин "Итхэвон фожиаси ёки бошқа бирор-бир реал ҳаётий фожиага шама қилиш ёки уни суиистеъмол қилиш нияти ҳеч қайси шаклда бўлмаганини" таъкидлади.
Бу қарор "10.29 Итхэвон фожиасидан жабрланганлар оилалари уюшмаси" томонидан ижобий кутиб олинди, гарчи гуруҳ BBC’га Activision’дан тўғридан-тўғри кечирим сўраш хабарини олмаганини айтган бўлса-да.
Ўтган ҳафтада чиқарилган Modern Warfare 4 Шимолий Кореянинг Жанубий Кореяга бостириб киришига урғу бергани учун ҳам аллақачон танқидга учраган эди, чунки бу икки мамлакат расман ўнлаб йиллардан бери уруш ҳолатида бўлиб келмоқда.
Корея урушидаги жанговар ҳаракатлар 1953 йилда тўхтаган, аммо икки миллат ҳеч қачон тинчлик шартномасини имзоламаган ва дунёнинг ушбу қисмида низо хавфи жуда реаллигича қолмоқда.
Ўйин тақдимотида Call of Duty маркетинг бўйича бош директори Тайлер Бал BBC Newsbeat’га шундай деди: "Биз бу шунчаки кўнгилочар маҳсулот эканини тушунишимиз керак".