Наманган ва Андижонда «Регапен» савдогарлари қўлга олинди

Наманган ва Андижонда «Регапен» сотувчилари қўлга олинди

Наманган ва Андижон вилоятларида кучли таъсир қилувчи дори воситаларининг ноқонуний айланишига чек қўйилди. Иккита тезкор тадбир доирасида ҳуқуқ-тартибот идоралари ходимлари 3 мингдан ортиқ «Регапен» таблеткасини мусодара қилишди, гумонланувчилардан бири эса йирик туркумни 7,7 минг долларга сотаётган вақтда қўлга олинди.

Биринчи ҳибсга олиш Наманган вилоятининг Поп туманида содир бўлди. Бош прокуратура ҳузуридаги Иқтисодий жиноятларга қарши курашиш департаменти бўлими ва бошқа ҳуқуқ-тартибот идоралари ходимлари фуқарони 938 дона «Регапен» таблеткасини сотаётган вақтида қўлга олишди.

Қўлга олиш чоғида эркакнинг ёнидан худди шу кучли таъсир қилувчи дори воситасидан яна 1,8 минг дона таблетка топилди. Улар ҳам ашёвий далил сифатида олиб қўйилди.

Терговга қадар текширув давомида фуқаро ушбу дори воситаларини Фарғонада ўзининг илгари судланган таниши билан бирга сотиб олгани аниқланди. Дорилар етказиб берилгач, улардан бири товарни олдиндан белгиланган жойларга жойлаштириш ва сақланишини таъминлаш билан шуғулланган, иккинчиси эса харидорларни излаб, дориларни сотган.

Яна бир ҳолат Андижон вилоятининг Балиқчи туманида аниқланди. «Наврўз» маҳалласида яшовчи фуқаронинг уйи кўздан кечирилганда, ҳуқуқ-тартибот идоралари ходимлари 308 дона «Регапен» таблеткасини топишди. Текширув маълумотларига кўра, эркак ушбу дори воситасини кейинчалик сотиш мақсадида сақлаб келган.

Иккала ҳолат бўйича ҳам гиёҳвандлик воситалари, психотроп моддалар ёки уларнинг аналогларига кирмайдиган кучли таъсир қилувчи ёки заҳарли моддаларни ноқонуний муомалага киритиш учун жавобгарликни назарда тутувчи модда билан жиноят ишлари қўзғатилди.

Бундан аввал Қўқонда йирик туркумдаги гиёҳвандлик воситалари ва кучли таъсир қилувчи дори воситалари контрандасига чек қўйилган эди. Қўлга олинган шахсдан 2,4 килограмм гашиш ва 5,6 минг дона «Регапен» таблеткаси мусодара қилинган.