Мўғулистон президенти Ўзбекистон миллий павилёнига ташриф буюрди

Мўғулистон Президенти Ухнаагийн Хурелсух Улан-Баторда бўлиб ўтаётган СОП17 анжумани доирасида Ўзбекистоннинг миллий павилёнига ташриф буюрди. Унга Ўзбекистон Президентининг экология масалалари бўйича маслаҳатчиси, шунингдек, Экология ва иқлим ўзгариши миллий қўмитаси раиси Азиз Абдуҳакимов ҳамроҳлик қилди.

Ташриф чоғида Мўғулистон Президентига Ўзбекистонда экология соҳасида амалга оширилаётган ислоҳотлар ҳақида батафсил маълумот берилди. Шунингдек, атроф-муҳитни муҳофаза қилиш, иқлим ўзгариши ва икки давлат ўртасидаги ҳамкорликни янада кенгайтириш масалалари юзасидан ўзаро фикр алмашилди.

Ухнаагийн Хурелсух Ўзбекистон томонидан илгари сурилаётган ташаббусларни ҳамда экологик муаммоларни ҳал этиш борасидаги саъй-ҳаракатларни юқори баҳолади. Бундан ташқари, у экологик ва иқлим муаммоларини бартараф этишда икки томонлама ҳамкорликни янада мустаҳкамлашга тайёрлигини таъкидлади.