“Мен ва яна бир шеригим тирик қолдик”. Россия—Украина урушида қатнашган 19 ёшли самарқандликка суд ҳукми ўқилди
“Мен ва яна бир шеригим тирик қолдик”. Россия—Украина урушида қатнашган 19 ёшли самарқандликка суд ҳукми ўқилди
Самарқанд вилоятининг Нарпай туманида Россия—Украина урушида Россия Қуролли кучлари сафида қатнашган 19 ёшли йигитга суд ҳукми чиқарилди.
Маълум қилинишича, Нарпай туманида яшовчи С.Ф. мактабни битиргач, мавсумий ишларда ишлаган. 2024-йил кузида у ишлаш мақсадида Россиянинг Владивосток шаҳрида яшовчи акаси ва амакисининг ёнига борган. У 4-5 ой давомида амакиси топиб берган қурилиш ишларида меҳнат қилган.
2024-йил 31-декабр куни С.Ф. Янги йилни кутиб олиш учун амакисининг ижарадаги уйига меҳмонга боргани айтилади. Эртаси куни эрталаб ўз яшаш жойига қайтиш учун такси чақирган. Йўлда полиция ходимлари автомобилни тўхтатиб, аввал ҳайдовчининг, кейин эса унинг ҳужжатларини сўраган. С.Ф. ҳужжатларини кўрсата олмагач, машинадан туширилиб, тинтув қилинган.
Полиция ходимлари унинг курткаси чўнтагидан селлофан пакетга ўралган гиёҳвандлик воситасини топган. У пакет ўзига тегишли эмаслигини ва уни биринчи марта кўраётганини айтган бўлса-да, полиция бўлимига олиб кетилиб, икки нафар холис иштирокида қайта тинтув қилинган ва қамоққа олинган. Экспертиза пакет ичидаги модда героин эканини аниқлаган. С.Ф. тергов давомида айбловни тан олмагани сабабли унинг қамоқда сақлаш муддати ҳар икки ойда узайтирилиб, жараён тўққиз ойга чўзилган.
Судланувчининг сўзларига кўра, шу давр мобайнида уни айбига иқрор бўлиш ва Россия армияси сафида Украинадаги урушга боришга кўндириш учун қийнашган.
“Ҳар куни карсерга қамаб, овқат ва сув бермасдан калтаклашди. Урушга боришга рози бўлсам, катта миқдорда пул, Россия фуқаролиги берилиши ва жазодан озод қилинишимни айтишарди. Тўққиз ойлик қийноқларга охири чидай олмасдан, айбимни тан олишга мажбур бўлдим”, деган С.Ф. ўз кўрсатмасида.
2025-йил 18-сентябр куни Россия Мудофаа вазирлиги ходимлари С.F.ga бир йиллик ҳарбий шартнома эвазига 2,5 миллион рубл, уй-жой, Россия фуқаролиги ва жазодан шартли равишда озодликни таклиф қилган. У таклифга рози бўлиб, ўша куннинг ўзида шартномани имзолаган.
Эртаси куни С.Ф. ва бошқалар Владивосток яқинидаги Уссурийск шаҳрида жойлашган ҳарбий қисмга олиб борилган.
“У ерда турли миллатга мансуб тахминан 600 кишича одам бор эди. Улар орасида қўли ёки оёғидан айрилганларни кўриб, юрагим орқага тортди. Шартномани бекор қилмоқчи бўлдим, аммо энди ортга йўл йўқ эди”, дейди судланувчи.
Орадан бир ҳафта ўтиб, 300 киши, жумладан С.Ф. ҳам ҳарбий самолётда Ростов-на-Донудаги полигонга жўнатилган. Унга шахсий маълумотлари ва ҳарбий қисм рақами ёзилган ҳужжат, жетон ҳамда банк картаси берилган.
Йигит полигонда уч ҳафта давомида автоматдан ўқ отиш, граната улоқтириш, окоп қазиш, биринчи тиббий ёрдам кўрсатиш ва ҳарбий алоқа бўйича машғулотлардан ўтган. Кейинчалик яна 48 нафар ҳарбий билан Донецк ҳудудидаги бошқа полигонга олиб борилиб, тайёргарлик давом эттирилган. Сўнг у 35-армия таркибидаги бўлинмалардан бирига ўқчи сифатида бириктирилган. Илк жанговар топшириқда гуруҳ Запорожье вилоятидаги Гуляйполе шаҳарчаси томон юборилган.
Манзилга яқинлашганда улар ФПВ-дронлар ҳужумига учраган. Портлаш оқибатида йигитнинг ўнг оёғи ва танасининг бошқа қисмлари жароҳатланиб, ҳушини йўқотган.
“Ҳушимга келганимда мен ва яна бир нафар рус миллатига мансуб йигит тирик қолганини кўрдим. Қолган барча шерикларим ҳалок бўлган эди. Оёғимдан оқаётган қонни ўзим тўхтатиб, ортга қайтдим”, дейди С.Ф.
Яраланган йигит Мариуполдаги ҳарбий шифохонага олиб борилиб, 20 кун даволанган. Даволанишдан сўнг у яна ҳарбий полигонга қайтарилган. Бироқ Гуляйполе ҳудудидан қочиб, 2-3 ҳафта давомида Бердянск томондаги эгасиз уйда яшириниб ётган.
Шу вақт ичида у интернет орқали россиялик қизлар билан танишиб, бошидан кечирган воқеаларни айтиб берган. Қизлар йигитни Донецкдаги уйига олиб бориб, танишлари орқали Россия ҳудудига ўтишига ёрдам берган.
Шундан сўнг у таксида Ростовга бориб, у ердаги Ўзбекистон ваколатхонасига ёрдам сўраб мурожаат қилган. С.F.ga 2026-йил 17-апрел куни ватанга қайтиш гувоҳномаси берилгач, Ўзбекистонга қайтиб келган.
Судда С.Ф. айбига иқрор бўлиб, қилган ишидан пушаймонлигини билдирган ва енгиллик сўраган. Суд ҳукмига кўра, С.Ф. Жиноят кодексининг 154-моддаси 1-қисмида (ёлланиш) айбдор деб топилиб, унга тўрт йил муддатга озодликни чеклаш жазоси тайинланган.