“Урушга кирган биринчи кунимдаёқ дрон ҳужумига учрадик”. Россия армиясига ёлланган наманганлик йигит 2 йилга қамалди

“Урушга кирган биринчи кунимдаёқ дрон ҳужумига учрадик”. Россия армиясига ёлланган наманганлик йигит 2 йилга қамалди

Россия армияси таркибида Украинадаги урушга юборилган, илк жанговар топшириқ вақтидаёқ дрон ҳужуми сабаб яраланган 25 ёшли ўзбекистонлик йигит икки йилга озодликдан маҳрум қилинди.

Маълум бўлишича, Наманган вилоятида яшовчи Ф.А. 2021-йил ноябрида иш излаб Россияга борган ва Екатеринбург ҳамда Пенза шаҳарларида турли юмушлар билан шуғулланган.

2022-йил 13-сентябр куни Ф.А. Улуғбек исмли танишининг таклифига биноан ўрмонда қолдирилган гиёҳвандлик воситасини олишга борганда Россия ҳуқуқни муҳофаза қилувчи органлари томонидан қўлга олинган. Пенза суди уни гиёҳвандлик воситаларининг ноқонуний муомаласи билан боғлиқ жиноятда айбдор деб топиб, 8 йил-у 6 ойга озодликдан маҳрум қилган. Ҳукм чиққач, у жазони Пенза шаҳридаги 4-сонли қаттиқ тартибли колонияда ўтай бошлаган. Жазони ўташ жараёнида муассасага ҳарбийлар келиб, маҳкумларга Украина урушида қатнашиш эвазига пул ва Россия фуқаролигини таклиф қилган.

Аввалига у урушга боришга рози бўлмаган. Бироқ қамоқхона ходимлари таклифни рад этган ўзбек, тожик ва қирғиз миллатига мансуб маҳкумларни қийнаб, карсерга жойлаштирган.

“Урушдаги вазиятни билганим учун аввалига шартномага рози бўлмадим. Қамоқхона ходимлари бизга бир умр шу ерда қолиб кетишимизни, ҳеч ким ҳимоя қилмаслигини айтишди. Охири қийноқ ва босимларга чидай олмай, шартномани имзолашга мажбур бўлдим”, дея кўрсатма берган Ф.А.

Ф.А. 2025-йил июл ойи охирида Россия Мудофаа вазирлиги билан бир йиллик шартнома имзолаган. Унда 1 миллион 900 минг рубл бир марталик мукофот ҳамда ойига 210 минг рубл иш ҳақи тўланиши кўрсатилган. Амалда унинг банк картасига 400 минг рубл ўтказиб берилган. Шунингдек, унга Россия фуқаролиги ва паспорти берилган.

Шундан кейин у бошқа маҳкумлар билан манзили сир тутилган аеропортга, у ердан эса самолётда Азов денгизи яқинидаги ҳудудга олиб борилган. Унга ҳарбий кийим, Калашников автомати берилиб, жанговар қуролдан фойдаланиш ҳамда дронлардан ҳимояланиш бўйича машғулотлар ўтказилган. Машғулотлар тугагач, у Россия денгиз пиёда қўшинларига қарашли 336-сонли ҳарбий қисмга гранатомётчи сифатида қабул қилиниб, Малиновка номли ҳудудга юборилган.

Ф.А. яна етти нафар ҳарбий билан “Багги” русумли автомобилда жанг кетаётган ҳудудга йўл олаётганида уларнинг машинасига Украина дрони келиб урилган.

“Урушга кирган биринчи куним эди. Машинамизга дрон урилиб, жуда кучли портлаш юз берди. Нима бўлганини тушунмай қолдим. Кейин қорним ва ўнг сонимда қаттиқ оғриқ сездим, жароҳатларимдан қон оқаётган эди. Шундан сўнг ҳушимни йўқотдим. Ўзимга келганимда ҳарбий госпиталда ётган эдим”, дейди Ф.А.

Ростовда жарроҳлик амалиёти орқали унинг қорнидаги металл парчаси олиб ташланган, сонидаги майда металл парчаси эса танасида қолдирилган. Йигирма кун даволангач, уни Калининграддаги ҳарбий қисмга юборишган, бироқ жангга яроқсиз бўлгани сабабли 2026-йил февралига қадар ҳарбий қисмда сақлашган.

7-феврал куни Коля исмли старшина уни яқин кунларда яна жанговар ҳудудга олиб кетишлари мумкинлигини айтган. Шундан сўнг у ҳарбий қисмни тарк этишга қарор қилган. 8-феврал куни ҳарбий қисмдан чиқиб, Калининград аеропортига борган ва Россия паспорти орқали Москвага чипта сотиб олган. Пойтахтга етиб боргач, Ўзбекистон элчихонасига мурожаат қилиб, паспортини йўқотиб қўйганини айтиб, ёрдам сўраган.

Элчихона ходимлари унга ватанга қайтиш гувоҳномасини расмийлаштириб бергач, Ф.А. Москва—Тошкент рейси орқали Ўзбекистонга қайтиб келган.

Тергов давомида унинг телефонидан Россия армиясида хизмат қилган пайтидаги суратлари, Россия паспорти ҳамда Калининград вилоятида берилган фахрий ёрлиқ тасвири топилган.

Судда у айбига тўлиқ иқрор бўлиб, бу ишга ноиложликдан қўл урганини ва қилмишидан пушаймонлигини билдирган.

Жиноят ишлари бўйича Поп туман суди Ф.A.ni Жиноят кодексининг 154-моддаси 1-қисми (Ёлланиш) билан айбдор деб топиб, унга икки йил муддатга озодликдан маҳрум қилиш жазоси тайинлаган.

Судланувчига иш ҳақининг 20 фоизини давлат даромади ҳисобига ушлаб қолиш шарти билан уч йил муддатга ахлоқ тузатиш ишлари жазоси тайинланган.