“9 ой ҳар куни карсерга қамаб, калтаклашди”. Украинада жанг қилган 19 ёшли йигитнинг озодлиги 4 йилга чекланди
Россияда гиёҳвандлик билан боғлиқ жиноят учун қамалган 19 ёшли ўзбекистонлик қамоқда унга босим ўтказилгани ва урушда қатнашиш эвазига озодлик, пул ва фуқаролик ваъда қилинганини айтди. У шартнома тузиб, Украинада жанг қилган ва ярадор бўлган. Суд унга 4 йилга озодликни чеклаш жазосини тайинлади.
"9 ой давомида ҳар куни карсерга қамаб, калтаклашди". Украинада жанг қилган 19 ёшли йигитнинг озодлиги 4 йилга чекланди.
3-август куни Самарқанд вилояти Нарпай тумани жиноят ишлари бўйича судида Россия-Украина урушида Россия томонида жанг қилган 19 ёшли фуқаронинг иши кўриб чиқилди. "Газета" суд ҳужжати билан танишди.
Судланувчи 2024-йилнинг кузида иш излаб Россиянинг Владивосток шаҳрига борган. У ерда гиёҳванд моддаларнинг ноқонуний савдоси билан боғлиқ жиноят содир этгани учун озодликдан маҳрум этилиб, жазони Владивостокдаги жазони ижро этиш муассасасида ўтаган.
Жазони ўташ даврида у муддатидан илгари озод бўлиш, ўзига нисбатан қонуний чора кўрилмаслиги, Россия фуқаролигини олиш ва бошқа шахсий манфаатларни кўзлаб, 2025-йил 18-сентабрда Россия Мудофаа вазирлиги билан шартнома тузиб, ҳарбий хизматга ёлланган.
Суд ҳужжатларига кўра, у Ростов шаҳри ва Донецк вилоятидаги ҳарбий полигонларда биринчи тиббий ёрдам кўрсатиш, граната улоқтириш, қуролдан ўқ отиш ва жисмоний тайёргарлик бўйича машғулотлардан ўтган. Шунингдек, ҳарбий истеҳкомлар – блиндажлар қуриш ишларига жалб қилинган.
2026-йил январ ойида судланувчи Украинага қарши жангларда, ҳужжатда қайд этилганидек, Украина давлатининг Гуляйполе вилоятида иштирок этган. Жанглар вақтида ФПВ-дронлар портлаши оқибатида ўнг оёғи ва танасининг бошқа қисмларидан жароҳат олган.
Судланувчи суд мажлисида айбига тўлиқ иқрорлик билдирган. Унинг кўрсатмаларига кўра, 2024-йил кузида ишлаш ва пул топиш мақсадида Владивостокка борган. У ерда амакиси ёрдамида қурилиш ишларида 4-5 ой ишлаган.
Унинг айтишича, 2025-йил 1-январ куни амакисининг уйидан ижара хонадонига кетаётганида такси полиция ходимлари томонидан тўхтатилган. Ҳужжатлари бўлмагани сабабли шахсий тинтув қилинган ва курткасининг чўнтагидан қора селлофан пакетга ўралган гиёҳвандлик воситаси топилган.
Судланувчи ушбу модда унга тегишли эмаслигини ва уни биринчи марта кўраётганини айтган. Кейинчалик пакетда героин борлиги аниқланган. У дастлабки тергов давомида айбловни тан олмаганини билдирган.
**"Тўққиз ой давомида қамоқда сақланиб, ҳар куни калтакландим"**
Судланувчининг кўрсатмаларига кўра, Россияда унга нисбатан қўзғатилган жиноят иши суди тўққиз ойга чўзилган. У шу давр мобайнида ҳар куни карсерга қамалганини, овқат ва сув берилмасдан қийноққа солингани ва калтакланганини айтган.
У қамоқда сақланган вақтида у ердаги бошқа айбланувчилар ҳам унга мунтазам равишда босим ўтказганини билдирган. Уларнинг айтишича, агар у Россия ва Украина ўртасидаги урушда Россия қуролли кучлари сафида қатнашишга рози бўлса, унга катта миқдорда пул берилиши, Россия фуқаролигини олиши ва жазодан озод бўлиши мумкин бўлган.
Судланувчи тўққиз ой давомида ўзига қўйилган айбловни тан олмаганини айтган. Унинг сўзларига кўра, қийноқларга чидай олмагач, охир-оқибат айбловни тан олишга мажбур бўлган.
Шундан кейин, унинг кўрсатмаларига кўра, Россия Мудофаа вазирлиги масъул ходимлари унга Украинага қарши ҳарбий ҳаракатларда қатнашиш шарти билан жазодан шартли равишда озод этилишни таклиф қилган.
**"Бир йиллик шартнома эвазига 2,5 млн рубл ваъда қилишди"**
Унинг кўрсатмаларига кўра, 2025-йил 18-сентабр куни Россия Мудофаа вазирлиги масъул ходимлари унга Украинага қарши ҳарбий ҳаракатларда иштирок эца, жазодан шартли равишда озод қилиниши, бир йиллик ҳарбий шартнома эвазига 2,5 млн рубл олиши, уй-жой билан таъминланиши ва Россия фуқаролигини олиши мумкинлигини айтган.
Судланувчи бу таклифга рози бўлиб, шу куни шартнома имзолаган. 19-сентабр куни у Владивосток яқинидаги Уссурийскда жойлашган ҳарбий қисмга олиб борилган.
У ерда турли миллат вакилларидан иборат ҳарбий хизматчилар бўлган. Судланувчининг айтишича, уларнинг орасида қўл-оёғидан айрилганлар ҳам бор эди. Тахминан 8-10 кундан сўнг, 25-сентабр куни уни бошқа 300 киши билан бирга ҳарбий аеропортга олиб боришган. Шундан кейин улар Ростов-Дон шаҳридаги ҳарбий полигонга юборилган.
Судланувчи Ростов-на-Дону яқинидаги полигонда уч ҳафта давомида бошланғич ҳарбий тайёргарликдан ўтганини айтган. У ерда автоматдан ўқ отиш, граната улоқтириш, окоп қазиш, биринчи тиббий ёрдам кўрсатиш ва ҳарбий алоқа бўйича амалий машғулотлар ўтказилган.
Кейинчалик уни 48 нафар шериги билан Донецк вилоятидаги Стародубовка ва Суженка шаҳар ва қишлоқлари яқинидаги ҳарбий полигонларга олиб боришган. У ерда ҳам уч ҳафта ҳарбий тайёргарликдан ўтишган. Судланувчининг кўрсатмаларига кўра, 2025-йил ноябр охири – декабр бошларида уларга биринчи ҳарбий топшириқ берилган.
**"Дронлар ҳужумида ярадор бўлдим, шерикларимнинг аксарияти ҳалок бўлди"**
Судланувчи Запороже вилоятидаги Гуляйполе шаҳрига яқинлашган пайтда дронлар ҳужумига учраганини айтган. Ўнг оёғи ва танасининг бошқа қисмларидан жароҳат олган ва ҳушини йўқотган.
"Ҳушимга келган вақтимда мен ва яна бир нафар рус миллатига мансуб шеригим тирик қолган эдик, қолган барча шериклари ҳалок бўлганди", — деди у.
У ўзига биринчи тиббий ёрдам кўрсатиб, оёғидан қон кетишини тўхтатган ва орқага қайтган. Жароҳати оғир бўлгани сабабли аввал шифохонага, кейин Мариуполдаги ҳарбий шифохонага олиб борилган. У ерда 20 кун даволанган.
**"Интернетда қизлар билан танишдим, улар Россияга қайтишимга ёрдам берди"**
Судланувчининг айтишича, шифохонадан сўнг яна ҳарбий полигонга юборилган. Бироқ у Запороже вилоятидаги Гуляйполе ҳудудидан қочиб, Бердянск томонга ўтган ва эгаси йўқ уйда тахминан 2-3 ҳафта яшаган.
У интернет орқали рус миллатига мансуб қизлар билан танишган ва уларга бошидан кечирган воқеаларни айтган. Қизлар уни Донецк шаҳрига олиб бориб, танишлари орқали Россия ҳудудига ўтишини таъминлашган.
Шундан сўнг судланувчи таксида Ростов шаҳрига бориб, Ўзбекистон элчихонасига мурожаат қилган. У ерда урушдан қочиб келгани ва паспорти йўқлигини айтган.
2026-йил 17-апрел куни унга Ўзбекистонга қайтиш гувоҳномаси берилган. 18-апрел куни у таксида Ўзбекистонга йўлга чиққан ва 21-апрел куни соат 13:30 да Тошкент орқали Самарқандга келган.
Судланувчи қилмишидан пушаймонлигини билдириб, шахсини инобатга олган ҳолда унга нисбатан қонуний енгиллик беришни сўраган.
Суд судланувчининг айбига иқрорлигини ва қилмишидан чин кўнгилдан пушаймонлигини жазони енгиллаштирувчи ҳолатлар сифатида баҳолади. Айбни оғирлаштирувчи ҳолатлар мавжуд эмаслиги қайд этилди.
Судланувчи Жиноят кодексининг 154-моддаси (Ёлланиш) 1-қисми бўйича айбли деб топилди. Унга Жиноят кодексининг 57-моддаси (Енгилроқ жазо тайинлаш) қўлланилиб, 4 йил муддатга озодликни чеклаш жазоси тайинланди.
Суд қарорига кўра, судланувчи жазони Нарпай тумани Бирлик маҳалласидаги яшаш хонадонида ўтайди. Унга иш жойига бориш ва уйига қайтиш учун зарур бўлган вақтдан ташқари яшаш жойини тарк этиш тақиқланди.
Шунингдек, унга Нарпай тумани ИИБ рухсатисиз яшаш жойини ўзгартирмаслик ва Самарқанд вилояти ҳудудидан ташқарига чиқмаслик мажбуриятлари юклатилди. Унинг хулқ-атвори устидан назорат Нарпай туман ИИБ зиммасига юклатилди.