“Манчестер Сити” “Ливерпул” футболчиси учун 99 млн евро таклиф қилишга тайёр — Романо

“Манчестер Сити” “Ливерпул” футболчиси Коди Гакпо учун 99 миллион евро таклиф қилишга тайёрланмоқда, дея хабар берди таниқли инсайдер Фабрицио Романо. “Шаҳарликлар” нидерландиялик футболчини ўз сафига қўшиб олиш мақсадида унинг вакиллари билан музокараларни бошлаб юборган.

Романонинг маълумотларига кўра, Гакпога “Тоттенҳем” ҳам қизиқиш билдирган, бироқ футболчининг ўзи “Манчестер Сити” вариантини афзал кўрмоқда. Эндиликда “Сити” мерсисайдликларга 85 миллион фунт (99 миллион евро) миқдорида расмий таклиф юборишга тайёр.

“Ливерпул” Гакпони сотишга қарши эмас, чунки клуб “ПСЖ” вингери Бредли Барколяни 123 миллион фунт эвазига сотиб олиш бўйича келишувга эришган. Шунингдек, таркибда Виктор Мунёс ва Рио Нгумоҳа каби футболчилар ҳам борлиги сабабли, Гакпо асосий таркибдаги ўрнини йўқотиши мумкинлигини тушуниб турибди.

Бу трансфер “Ливерпул”га сезиларли даромад келтириши кутилмоқда, чунки улар Гакпони 2023-йил январида “ПСЖ”дан атиги 35 миллион фунтга сотиб олган эди. Бироқ, жамоа ҳужумчиси Уго Экитике оғир жароҳати туфайли 2027-йилгача сафдан чиққан, Александр Исак ҳам энг яхши спорт формасида эмас. Ҳужум чизиғидаги бундай муаммолар фонида кўп қиррали ўйинчини сотиб юбориш мавсум давомида “Ливерпул”га қимматга тушиши мумкин.

Маълумот учун, Коди Гакпонинг “Ливерпул” билан амалдаги шартномаси 2030-йилнинг ёзига қадар мўлжалланган. Трансфермаркт портали унинг бозор қийматини 60 миллион еврога баҳолаган.