Макрон Ангела Меркелни соғинганини айтди
Франсия президенти Европа Иттифоқининг амалдаги раҳбарлари билан мулоқот қилиш унга зерикарли туюлаётганини маълум қилди.
Макрон Ангела Меркелни соғинганини айтди
Франсия президенти Эммануел Макрон Германиянинг собиқ канслери Ангела Меркелни соғинаётганини маълум қилди. У Европа Иттифоқининг ҳозирги раҳбарлари билан мулоқот унга зерикарли туюлаётганини айтиб, Италиянинг собиқ бош вазири Марио Драги билан суҳбатларни ҳам жуда қўмсаётганини тан олди.
Бу баёнотлар ва журналистнинг Макрон билан шахсий ёзишмалари 2024-йилда бўлиб ўтган.
“Зерикяпман. Ҳамма нарса ғамгин ва ижодий энергиядан холи. Мен Марио Драги ва Ангела Меркелни жуда соғиняпман”, деган у журналистга.
Франсия раҳбари баъзан буларнинг барчаси унга оғир ботаётганини, бироқ тушкунликка тушмаётганини ҳам қўшимча қилган.
Эътиборлиси, 2024-йил ноябрида Меркел ҳам лавозимидан кетганидан кейин Макрон билан учрашувларни соғинаётганини айтганди. Ўшанда у франсуз етакчисининг маданияти, заковати ва ечим топишга ижодий ёндашувини юқори баҳолаган.
Ангела Меркел 2000-йилдан 2018-йилгача Христиан-демократик иттифоқи раиси, 2005-йилдан 2021-йилгача Германия канслери бўлиб ишлаган.
Марио Драги эса 2011-йилдан 2019-йилгача Европа марказий банки президенти, 2021-йилдан 2022-йилгача Италия бош вазири лавозимида фаолият юритган.
Макрон Франсиядаги сиёсий вазият, 2024-йилги муддатидан илгари парламент сайловлари ва “Миллий бирлашув” партиясининг келажакдаги имкониятларига ҳам тўхталган. У рақибларининг чақириқларига қарамай, истеъфога чиқмоқчи эмаслигини билдирган.
Шу билан бирга, президент 2027-йилда ваколат муддати тугаганидан кейинги режалари ҳақида ҳам гапирган. У Франсиядан ташқарида ўз бизнесини бошлашни ўйлаётганини, аммо ҳеч кимга ёлланиб ишламоқчи эмаслигини айтган.
2026-йил сентябр ойида эса Макрон лавозимини тарк этгач, яна президентликка қайтиш эҳтимоли ҳақида таъкидлаган.
“Келинг, аниқ гапирайлик: конституциямизга кўра, фуқаро кетма-кет икки муддатга сайланиш ҳуқуқига эга. Менинг муддатим келаси йилнинг май ойида тугайди ва Франсия халқи бошқа одамни сайлайди. Аммо мен ҳеч нарсани истисно қилмайман. Қайтиш — бу жуда ноодатий ҳолат, лекин буни вақт кўрсатади”, деган эди Макрон ўшанда Американинг Вариетй журналига берган интервюсида.
Франсия президентининг қўшимча қилишича, “ҳаёт ижодкорликка тўла — баъзан ҳатто кинодан ҳам кўпроқ”.