Макрон: Европа Россиянинг нишонига айланиши мумкин
Франсия президенти Эммануел Макрон Россияда 300 мингга яқин киши сафарбар қилиниши мумкинлиги ҳақидаги ссенарийни ишонарли деб баҳолади. Унинг айтишича, сафарбарлик очиқ эълон қилиниши ёки яширин тарзда ўтказилиши мумкин. Макрон, шунингдек, Европа бўйлаб душманона ҳаракатлар кўпайганидан огоҳлантирди.
**Макрон: Европа Россиянинг нишонига айланиши мумкин**
Франсия президенти Эммануел Макрон Москва қарийб 300 минг кишини сафарбар қилиши мумкинлиги ҳақидаги ссенарийни ишонарли деб билишини айтди.
«Улар ўз сайловларини кутишди. Сайловлар ўтди ва бугун Россия бу ишни амалга ошириши аниқ», - деди Макрон. У 18–20-сентабр кунлари Россия Давлат думасига бўлиб ўтган сайловларни назарда тутган.
Франсия президенти, шунингдек, Москва сафарбарликни очиқ эълон қиладими ёки уни яширин тарзда амалга оширадими — ҳозирча номаълум эканини қўшимча қилди.
Макрон Россия бундай қадамга тайёргарлик кўраётганидан дарак берувчи бир нечта белгилар кузатилганини айтди. АҚШ, Европа ва Украина разведкаларининг маълумотларига муносабат билдирар экан, у: «Бу бизга ишонарли бўлиб кўринаётган ссенарий», - дея таъкидлади.
**Европада душманлик ҳаракатлари кўпайган**
Макроннинг айтишича, сўнгги ҳафталарда Европа бўйлаб душманона ҳаракатлар сони ошган. У ўтган ҳафта сиёсий кучлар вакилларини йиғиб, уларни таҳдид кучайгани ва бунинг Франсия учун оқибатлари ҳақида огоҳлантирганини маълум қилди.
Франсия президентининг фикрича, Москва европаликлар Киевга ёрдам бераётгани сабабли Европани Украинанинг стратегик орқа ҳудуди деб ҳисоблайди. У Украина Россияни урушни тўхтатишга мажбур қилиш мақсадида унинг нефтни қайта ишлаш заводлари ва бошқа обьектларига зарбалар бераётганини ҳам қайд этди.
«Шу сабабли Европа нишонга айланиши мумкин», - деди Макрон.
Унинг таъкидлашича, ҳужумлар ахборот майдонида ёлғон маълумотлар тарқатиш орқали, шунингдек, кибермаконда ҳам амалга оширилмоқда.
**Франсия муҳим инфратузилмани ҳимоя қилиш режасини тайёрламоқда**
Макрон 18-сентабр куни Россия томонидан гибрид ҳужумлар хавфи ортиб бораётгани фонида Франсия ўта муҳим инфратузилмани ҳимоя қилиш режасини ишлаб чиқаётганини маълум қилган эди.
Хабарда қайд этилишича, аввал Россия сайловларга аралашиш ва мигрантлардан Европага босим ўтказиш воситаси сифатида фойдаланишда айбланган бўлса, энди Европа махсус хизматлари диверсиялар, қасддан ўт қўйиш, муҳим инфратузилмага ҳужумлар ва ҳаво ҳудуди бузилиши ҳолатларида ҳам Россиянинг эҳтимолий иштирокини текширмоқда.