Литва парламенти ядро қуролини жойлаштиришга қўйилган тақиқни бекор қилиш ҳақидаги қонун лойиҳасини қабул қилди
Литва парламенти ядро қуролини жойлаштиришга тақиқни бекор қилиш ҳақидаги қонун лойиҳасини маъқуллади
Литва парламенти Конституциядан мамлакат ҳудудида ядро қуролини жойлаштиришни тақиқловчи бандни олиб ташлашга доир қонун лойиҳасини қўллаб-қувватлади. ЛРТ хабарига кўра, 99 нафар депутат ҳужжатни ёқлаб овоз берган, 13 нафари қарши чиққан, яна беш депутат бетараф қолган.
Қонун лойиҳаси тўлиқ қабул қилиниши учун парламент яна икки бор овоз бериши керак. Овоз беришлар орасида уч ойлик танаффус бўлиши лозим: биринчиси 9-октябрга, иккинчиси эса 12-январга белгиланган. Тузатиш қабул қилиниши учун 141 депутатдан камида 94 нафари уни қўллаб-қувватлаши шарт.
Июн ойи бошида Финансиал Тимес АҚШ Полша ва Болтиқбўйи мамлакатларида ядро қуролини жойлаштириш бўйича музокаралар олиб бораётгани ҳақида ёзган эди. Нашр манбаларига кўра, гап ядро қуролини ташишга қодир АҚШ бомбардимончи самолётлари ҳақида кетмоқда. Литва ҳукумати бундай музокаралар олиб борилаётганини тасдиқлаб, бунинг учун Конституцияга тегишли ўзгартиришлар киритиш масаласини кўриб чиқаётганини билдирган.
Сентябр ойида Кремл, агар Литва ўз ҳудудида ядро арсеналини жойлаштирса, мамлакат Россия ядро қуролининг “нишонига айланишини” маълум қилди.
Ҳозирда ядро қуролини ташишга қодир АҚШ ҳарбий самолётлари НАТОнинг олти давлатида — Белгия, Буюк Британия, Германия, Италия, Нидерландия ва Туркияда жойлаштирилган.
Россия эса Украинага қарши кенг кўламли уруш бошланганидан сўнг ўз ядро қуролини Беларус ҳудудига жойлаштирди.