НАТО Литва ҳаво ҳудудига кирган дронни уриб туширди

**НАТО Литва ҳаво ҳудудига кирган дронни уриб туширди**

НАТО қирувчи самолётлари Литва ҳаво ҳудудига кириб келган дронни йўқ қилди. Бу ҳақда Литва президенти Гитанас Науседа ўзининг Хъдаги саҳифасида хабар берди.

Расмийларга кўра, дрон 15-сентябр куни қўшни Беларусдан Литванинг жанубий қисмига кирган бўлиши мумкин.

“Ҳозироқ Литва ҳаво ҳудудига кирган дрон НАТО қирувчи самолётлари томонидан йўқ қилинди”, деб ёзди Гитанас Науседа тунда.

Литва Миллий инқирозларни бошқариш маркази дроннинг кимга тегишли экани ҳали аниқланмаганини маълум қилди. 15-сентябр тонгида Вилнюс шаҳри ва унинг атрофидаги ҳудудларда дрон хавфи юзасидан огоҳлантириш берилди.

“Литва Қуролли кучлари ва НАТО Ҳаво ҳужумидан мудофаа миссиясида хизмат қилаётган италиялик масъулиятли учувчилар дронлар ҳужумига тезкор жавоб берди”, деди Литва Мудофаа вазирлиги.

Науседа Россиянинг Украинага қарши босқини давом этаётган бир вақтда бундай тайёргарлик муҳимлигини айтди.

“Литва НАТОдаги иттифоқчиларимиз билан биргаликда ҳаво ҳудудини ҳимоя қилади”, дея таъкидлади президент.

Москва бу воқеа юзасидан изоҳ бермади. Литванинг жанубий ва шарқий чегараларининг катта қисми Россиянинг муҳим иттифоқчиси бўлган Беларус билан туташади. 13-сентябр куни ҳам Литвада дронлар парвози қайд этилган эди. Кейинроқ Инқирозни бошқариш маркази обьект катта эҳтимол билан Беларусдан кириб келганини ва Россия ҳаво ҳудудига киришидан олдин мамлакат узра ҳаракатланганини билдирди.

Россиянинг Украинага қарши уруши давом этаётган бир пайтда ҳарбий дронларнинг Европа давлатлари ҳаво ҳудудларига кириб қолиши тез-тез кузатилмоқда.