Литва Марказий Осиё давлатлари фуқароларидан ишга жойлашиш учун аризаларни қабул қилишни вақтинча тўхтатди
Литва Марказий Осиё давлатлари фуқароларидан ишга жойлашиш бўйича аризаларни қабул қилишни вақтинча тўхтатди
Марказий Осиё давлатларидан Литвага келаётган ишчилар сони ортиб бораётгани фонида, мамлакат Миграция департаменти ушбу минтақадаги ташқи хизмат кўрсатиш марказлари фаолиятини вақтинча тўхтатди. Литвага кириш ва ишга жойлашиш учун аризалар айнан шу марказлар орқали топширилар эди. Бу ҳақда департамент раҳбари Индре Гаспере маълум қилди.
Унинг сўзларига кўра, сўнгги йилларда Марказий Осиёдан келаётганлар оқими сезиларли даражада ошган. Ишга жойлашиш бўйича аризалар сони кўплиги сабабли, расмийлар ташқи марказлар фаолиятини тўхтатиш ва янги аризаларни қабул қилишни тугатишга қарор қилишди.
«Ҳам иш берувчилар, ҳам ишга жойлашишни хоҳловчи чет элликларнинг умидларини инобатга олган ҳолда, ташқи марказлар фаолияти тўхтатилди ва аризалар бошқа қабул қилинмайди», — дея Гасперенинг сўзларидан иқтибос келтиради BNS.
Миграция департаменти маълумотларига кўра, 1 сентябрь ҳолатига кўра, деярли 227 минг чет эллик Литвада яшаш учун амалдаги рухсатномага эга бўлган. Улардан қарийб 80 минг нафари Украина, деярли 48 минг нафари Беларусь, 13 минг нафардан Россия ва Ўзбекистон фуқаролари бўлган. Бундан ташқари, мамлакатда 9,4 минг Ҳиндистон ва 7,4 минг Тожикистон фуқароси бўлган.
Литва бундан олдин ҳам минтақа мамлакатларидан ҳужжатларни қабул қилишни чеклаган эди. 2025 йил 22 октябрдан бошлаб Душанбедаги ташқи хизмат кўрсатиш марказида ҳужжатларни қабул қилиш тўхтатилган эди. Литва Миграция департаменти ўшанда буни иш берувчиларнинг эҳтиёжлари қайта кўриб чиқилгани ва ваколатли давлат органларининг хулосалари билан изоҳлаган эди.