Кунг-фуни билади, машинани кўтаради: Хитойда робот-қўриқчи намойиш этилди
Хитойнинг Унитрее компанияси кунг-фу ҳаракатларини бажарадиган, салто қиладиган ва автомобилнинг олд қисмини кўтара оладиган одамсимон роботини намойиш этди. Ҳ2-Х Кунг Фу Легенд Гуардиан деб номланган модел қўриқлаш ва қутқарув вазифалари учун мўлжаллангани айтилмоқда.
Кунг-фуни билади, машинани кўтаради: Хитойда робот-қўриқчи намойиш қилинди
Янги робот компаниянинг мавжуд Ҳ2 платформаси негизида ишлаб чиқилган. Унитрее тарқатган қисқа видеода унинг жисмоний имкониятлари ҳамда одамларни ҳимоя қилишга йўналтирилган саҳналаштирилган вазиятлар намойиш этилган.
Видеонинг бошида робот металл чиқиндилари майдончасидаги автомобил томига чиқиб, орқага салто қилади. Сўнг у тиззаси, тирсаги ва муштлари билан машинага зарба беради. Натижада эшиклар ва капотда аниқ эзилишлар ҳосил бўлади.
Кейин Ҳ2-Х баландлиги тўрт метр деб кўрсатилган платформадан сакрайди, ерга тушгач думалаб, яна оёққа туради. Кейинги кадрларида у сакраб тепиш ва салто каби ҳаракатларни бажаради.
Унитрееънинг айтишича, видеода ҳақиқий синовлар акс этган ва тасвир тезлиги оширилмаган.
Роликнинг бошқа қисмида қўриқлаш ва қутқарувга оид саҳналаштирилган ҳолатлар ҳам кўрсатилган. Бир эпизодда робот аёл билан қуролланган киши орасига кириб, уни чекинишга мажбур қилади. Яна бирида у яқинлашиб келаётган автомобил йўлида турган одамни итариб, четга олиб чиқади.
Бошқа бир саҳнада эса робот машина остидаги манекенни чиқариш учун автомобилнинг олд қисмини бироз кўтаради. Демак, видеода бутун автомобилни ердан узиб кўтариш эмас, унинг бир қисмини кўтариш тасвирланган.
Ҳ2-Хънинг батафсил техник хусусиятлари ҳозирча тўлиқ ошкор этилмаган. Компания тўлиқ қувватланган аккумулятор тахминан саккиз соат ишлашга етишини маълум қилмоқда. Бироқ бу кўрсаткич қайси юклама шароитида олингани номаълум. Узоқ юриш ва шиддатли сакрашлар автоном ишлаш вақтини камайтириши мумкин.
Таққослаш учун, оддий Ҳ2 модели сиғими 15 ампер-соат бўлган тез алмаштириладиган битта аккумулятор билан тахминан уч соат ишлайди. Янги роботда қандай батарея ёки энергия тежаш ечими қўллангани ҳақида тўлиқ маълумот берилмаган.
Эълон қилинган маълумотларга кўра, Ҳ2-Хънинг бўйи қарийб 182 сантиметр, вазни эса 70 килограмм бўлиб, бу борада у базавий Ҳ2 моделига мос келади.
Робот 31 та эркинлик даражасига эга. Бу унинг бўғимлари турли йўналишларда мустақил ҳаракатлана олишини англатади. Ҳар бир оёққа олтитадан, ҳар бир қўлга еттитадан, бел қисмига учта ва бош қисмига иккита эркинлик даражаси тўғри келади.