Конго Демократик Республикасидаги мактабда юз берган ёнғинда 20 дан ортиқ бола ҳалок бўлган бўлиши мумкинлигидан хавотир билдирилмоқда
Расмийларнинг маълум қилишича, исёнчилар назоратидаги шарқий Букаву шаҳрида иккита мактабни қамраб олган ёнғиндан қочиш пайтида тиқилинч юзага келган.
Конгодаги мактаб ёнғинида 20 дан ортиқ бола ҳалок бўлгани тахмин қилинмоқда
Ёнғин ўчирилган кўринади, аммо тутаётган харобалар қолган
Конго Демократик Республикаси шарқидаги исёнчилар назоратида бўлган Букаву шаҳрида иккита мактабни қамраб олган ёнғиндан қочишга уриниш пайтида юзага келган тиқилинчда камида 24 нафар мактаб ўқувчиси ҳалок бўлгани тахмин қилинмоқда, деб хабар берди маҳаллий юқори лавозимли мулозим.
Ёнғинда катталар ҳам ҳалок бўлгани хабар қилинган ва аҳоли зич жойлашган Кадуту коммунасида қурбонлар сони янада ортиши мумкинлигидан хавотирлар бор.
Омон қолганлар яқин атрофдаги шифохоналарга етказилган, воқеа жойидан олинган видеоларда шифохона полларида оғриқдан азоб чекиб ётган болалар акс этган.
Ёнғин оқибатида 300 га яқин уй ҳам вайрон бўлган, унинг келиб чиқиш сабаблари ҳозирча номаълум.
Ижтимоий тармоқларда тарқатилган суратларда ерда ҳаракатсиз ётган ёш болаларни кўриш мумкин.
Reuters ахборот агентлиги иқтибос келтирган гувоҳнинг сўзларига кўра, тушдан кейин ёнғин ўчирилган, бироқ вайроналар ва тўлқинсимон тунукалар орасидан ҳали ҳам тутун кўтарилмоқда эди.
Жанубий Киву провинциясининг пойтахти ва КДРнинг тепаликда жойлашган энг гавжум шаҳарларидан бири бўлган Букаву ўтган йилнинг февраль ойида М23 исёнчилари томонидан эгаллаб олинган эди.
Исёнчилар томонидан тайинланган расмийлар вазиятни баҳолаётганликларини ва бугун кечқурун қурбонларнинг дастлабки сонини эълон қилишларини айтмоқда.
Шу билан бирга, Киншасадаги ҳукумат қурбонлар сонини очиқламасдан, X тармоғида баёнот берди.
«Миллий таълим ва янги фуқаролик вазирлиги ҳалокатли ёнғин муносабати билан чуқур қайғуришини билдиради», дейилади хабарда.
«Бир неча киши ҳалок бўлгани ва кўплаб одамлар жароҳатлангани сабабли, қурбонлар сони ҳозирча дастлабки ҳисобланади. Вазир таъзия изҳор этди, оилалар билан бирдамлигини билдирди ва ўқиш давомийлигини таъминлаш учун зарар кўрган мактабларни баҳолашни буюрди».
Ушбу фожиа ўтган дам олиш кунлари Киншасада содир бўлган шунга ўхшаш ёнғиндан кейин юз берди, у ерда тўй маросимлари залидаги тиқилинчда маҳаллий аҳоли вакиллари ҳалок бўлган эди.
Бунга жавобан ҳукумат қатъий хавфсизлик чораларини кўришни буюрди ва жамоат жойларида стандартларга риоя этилишини таъминлаш учун бутун мамлакат бўйлаб гуруҳларни юборди.