Конго ДРда Эбола энг кўп тарқалган ҳудудлардаги мактаблар очилди

Конго Демократик Республикасида (КДР) Эбола вируси энг кўп тарқалган ҳудудлардаги мактаблар ўз фаолиятини қайта бошлади. Бу ҳақда Реутерс агентлиги хабар берди.

Дастлаб ҳукумат ушбу ҳудудларда анъанавий дарсларни вақтинча тўхтатиб, масофавий таълимга ўтишни режалаштирган эди. Бироқ, ўқувчиларнинг таълим жараёнларидан ортда қолиб кетиш хавфи вирус юқиши эҳтимолидан устун деб топилиб, бу қарор бекор қилинди.

Ҳукуматнинг 2-сентабр, чоршанба куни эълон қилган маълумотларига кўра, мамлакатдаги Эбола эпидемиясида вафот этганлар сони 3 мингдан ошган. Касаллик олти вилоятга тарқалган бўлиб, ўлим даражаси 48,6 фоизни ташкил этмоқда.

Итури вилоятида 1 мингдан ортиқ мактаб “қизил ҳудуд” деб таснифланган, яъни бу ҳудудларда Эбола юқиш хавфи юқори ёки фаол юқиш ҳолатлари кузатилмоқда. 19-августда эълон қилинган қоидаларга кўра, бундай мактабларда анъанавий дарслар ўрнига ҳар икки ҳафтада тарқатиладиган топшириқлар ҳамда радио ва телевидение орқали масофавий таълим ташкил этилиши керак эди.

Бироқ, мактаблар шу ҳафта одатдагидек очилди. Таълим вазирлиги вакилининг Реутерс агентлигига маълум қилишича, ҳукумат вилоят расмийларининг мурожаатидан сўнг дастлабки қарорни қайта кўриб чиққан. Ҳозирча Эбола билан касалланиш ҳолати аниқланган тақдирда мактаблар ёпилиб, масофавий таълимга ўтилиши белгиланган.

Шунингдек, Шимолий Киву ва Жанубий Киву вилоятларининг Руанда томонидан қўллаб-қувватланадиган АФС/М23 исёнчилари назоратидаги ҳудудларида ҳам мактаблар очилган. У ерда ўқувчилардан қўлларни ювиш ва синфхоналарда ижтимоий масофани сақлаш талаб қилинмоқда.

Август ойи охирида Жаҳон соғлиқни сақлаш ташкилоти Угандада Эбола вирусининг Бундибугё штамми билан боғлиқ эпидемия якунланганини маълум қилганди. Мамлакатда касаллик 20 кишида аниқланган, улардан 2 нафари вафот этган. Уганда ҳукумати 28-июл куни мамлакатни Эбола эпидемиясидан холи деб эълон қилган.