Канада провинцияси OpenAI устидан Тамблер-Риж мактабидаги отишма бўйича даъво аризаси киритди
Британ Колумбияси компанияни мерганнинг ChatGPT билан бўлган ташвишли мулоқотлари ҳақида ҳуқуқ-тартибот идораларига хабар бермаганликда айблади.
Канада провинцияси OpenAI компаниясини Тамблер-Риж мактабидаги отишма бўйича судга берди
Канада провинцияси OpenAI компаниясини Тамблер-Риждаги оммавий отишмадан олдин ChatGPT’даги хавотирли фойдаланувчи фаоллиги ҳақида расмий органларни огоҳлантирмаганликда айблаб, судга даъво аризаси киритди.
Компания 18 ёшли Жесси Ван Рутселаар февраль ойида саккиз кишини, жумладан олти нафар болани ўлдиришидан олдин унинг аккаунти ҳақида ҳуқуқ-тартибот идораларига хабар бермагани учун аллақачон узр сўраган.
Британ Колумбияси бош прокурори Ники Шарманинг таъкидлашича, душанба куни АҚШ федерал судига тақдим этилган даъво аризаси "технология компанияларининг жиддий зўравонлик хавфи мавжудлигидан хабардор бўлгандаги масъулияти" масаласини ўртага ташлайди.
Отишмада ҳалок бўлганлар ва жароҳатланганларнинг оилалари OpenAI устидан алоҳида даъво аризалари билан мурожаат қилишган.
ОАВ хабарларига кўра, Ван Рутселаарнинг ChatGPT’даги фаоллиги ҳужумдан бир неча ой олдин қуролли зўравонликка оид мазмуни туфайли OpenAI хавфсизлик хизмати томонидан белгилаб қўйилган, бироқ компания бу ҳақда маҳаллий ҳокимият органларини хабардор қилмаган.
Апрель ойида OpenAI бош ижрочи директори Сэм Альтман қурбонларнинг оилаларидан узр сўраган эди.
"Ҳуқуқ-тартибот идораларини огоҳлантирмаганимиздан чуқур афсусдаман", деб ёзган эди Альтман ўз очиқ хатида.
"Бугунги кунга қадар OpenAI омон қолганлар, оилалар ва Тамблер-Риж ҳамжамияти томонидан билдирилган хавотирларни ҳал қилиш учун сезиларли қадамлар қўймади", деди Шарма ўз баёнотида.
"Компанияда ҳали ҳам хавфсизлик чораларини кучайтириш, шаффофликни ошириш ва келажакда шу каби фожиаларнинг олдини олишга ёрдам берадиган аниқ чоралар кўриш орқали масъулиятни намойиш этиш имконияти бор".
Душанба куни журналистлар билан суҳбатда Шарма OpenAI чатлари мазмунини ўқиб чиқмаганини айтди.
"Биз OpenAI’дан ушбу чатларни ошкор қилишни сўрадик. Улар рад этишди. Ҳаммамиз улардан сўрашимиз керак: Нима учун?" деди у CBC хабарига кўра.
Шарманинг сўзларига кўра, даъво аризаси Калифорнияда топширилган, чунки отишма содир этган шахснинг ChatGPT аккаунти ҳақида хабар бермаслик тўғрисидаги қарор АҚШнинг айнан шу штатида қабул қилинган, деб хабар беради AFP.
Шарма журналистларга провинция томонидан ундириладиган ҳар қандай молиявий товон пули ўрта мактабни қайта тиклашга йўналтирилишини айтди.