ЧатГПТ аёлнинг эҳтимолий қотиллигини олдини олишга ёрдам берди
Америкада ОпенАИ компанияси хавфсизлик тизими ҳуқуқ-тартибот идораларига аёл кишига нисбатан қотиллик жиноятининг олдини олишда кўмаклашди.
ЧатГПТ аёлнинг эҳтимолий қотиллигининг олдини олишга ёрдам берди.
ОАВ хабарларига кўра, Голдман Сачс компаниясининг 25 ёшли ходими Даррен Шида Чжоу собиқ севгилисини ўғирлаш, зўрлаш ва ўлдиришни режалаштириш учун ЧатГПТ билан маслаҳатлашган. У жиноятни содир этгач, ўз жонига қасд қилишни ҳам режалаштирган.
ОпенАИ компаниясининг хавфсизлик тизими ушбу ёзишмани автоматик равишда эҳтимолий хавфли деб топган. Шундан сўнг, уни ОпенАИ мутахассислари текширган ва айнан улар маълумотни ҳуқуқ-тартибот идораларига топширишга қарор қилган. ЧатГПТ ўзи мустақил равишда полицияга жиноят ҳақида хабар бермаган.
Маълумотни олгач, ФҚБ ва маҳаллий ҳуқуқ-тартибот идоралари тергов ишларини бошлади. Якунда Чжоу ҳибсга олинди.
Тергов, шунингдек, эркак айрилиқдан сўнг турли телефон рақамлари ва аккаунтлардан фойдаланиб, собиқ севгилисини бир неча бор таъқиб қилганини ҳам аниқлади.
Чжоу учта жиноий айблов бўйича ўз айбига иқрор бўлди: қотиллик ёки оғир тан жароҳати етказиш билан таҳдид қилиш; жиддий таҳдид билан таъқиб этиш; жиноят содир этиш мақсадида алоқа воситасидан ноқонуний фойдаланиш.
Судя жиноят иши бўйича расмий ҳукм чиқармасдан, унга 8 йиллик пробация (синов муддати) тайинлади.
Бу воқеа сунъий интеллект тизимларидан зўравонлик хавфини барвақт аниқлашда қандай фойдаланиш мумкинлигига мисоллардан бири бўлди. Шу билан бирга, у фойдаланувчиларнинг сунъий интеллект билан ёзишмаларининг махфийлик чегаралари масаласини яна бир бор кун тартибига олиб чиқди.