Калининградда Европани кузатиш учун радар қурилмоқда
Радиолокацион стансия 3 минг км масофадаги обьектларни аниқлай олади. У НАТО давлатларининг дронлардан фойдаланиш самарадорлигига таъсир қилиши мумкин.
Калининградда Европани кузатиш учун радар қурилмоқда
Россиянинг Калининград вилоятида ҳарбийларга 3000 км гача масофада самолёт, ракета ва кемаларни аниқлаш имконини берадиган улкан радиолокацион стансия қурилиши якунланмоқда.
Радиолокация таъсири доирасига Европанинг катта қисми, жумладан, Буюк Британия, Франсия, Германия ва Украина кириши мумкин. Мажмуа Полша билан чегарадан 37 километр узоқликдаги Гвардейск туманида қурилмоқда.
Сунъий йўлдош тасвирларида ҳар бирининг узунлиги 500 метрдан ошадиган уч қатор антенна кўринади. Ҳудуд эса икки қатор девор билан ўралган. Полшанинг Дефенсе24 нашри маълумотларига кўра, қурилиш 2023-йил март ойида бошланган. Гап 29Б6 “Контейнер” мажмуасига ўхшаш радиолокация стансияси ҳақида бораётган бўлиши мумкин. У қисқа тўлқинли диапазонда ишлайди. Сигналлар ионосферадан қайтиб, узоқдаги обьектларни аниқлаш имконини беради.
Россия ҳарбийларининг таъкидлашича, “Контейнер” бир вақтнинг ўзида 10 минггача ҳаво нишонларини, жумладан, Ф-35 самолётларини кузатишга қодир. Литва Қуролли кучлари захираси полковниги Вайдотас Малиниониснинг айтишича, янги радар Россия қўмондонлигига НАТО билан можаро юзага келган тақдирда қарор қабул қилиш учун қўшимча вақт бериши мумкин.
Стансия орқали олинган маълумотлардан ҳужум операцияларини режалаштиришда ҳам фойдаланиш эҳтимоли бор. Малиниониснинг сўзларига кўра, катта ўлчами туфайли радарни нишонга олиш осон. Латвиялик ҳарбий таҳлилчи Эвия Дятковичнинг фикрича, радар рус ҳарбийларига паст учадиган обьектларни, жумладан, дронларни аниқлашда ҳам ёрдам беради. Унинг фикрича, бу НАТО давлатлари томонидан дронлардан фойдаланиш самарадорлигини пасайтириши мумкин.
Калининград вилоятининг Черняховск туманида диаметри 1600 метрдан ортиқ бўлган яна бир йирик ҳалқасимон радар қурилмоқда, деб хабар бермоқда Дефенсе24.
Унинг қурилиши ҳам 2023-йил март ойида бошланган. Иккала обьект ҳам ўзаро боғлиқ бўлиши мумкин. Аммо иккинчи мажмуанинг мақсади номаълум. Ҳудудда жами 20 дан ортиқ радиоелектрон разведка ва кураш обьектлари мавжуд.
Россия Калининград вилоятида юзтагача ядро каллагини жойлаштириши мумкин, дейди Малинионис. Полша ва Литванинг юқори мартабали манбалари эса уларнинг бир қисми аллақачон ушбу вилоятда жойлаштирилганини айтган.