Россия бир кунда иккита Су-30 қирувчисини йўқотган бўлиши мумкин
Россиянинг Калининград вилоятида Су-30 қирувчи самолёти қулаб тушди, унинг экипажи катапулта орқали чиқиб, омон қолди. Кейинроқ россиялик ҳарбий блогерлар шу куни яна бир Су-30 йўқотилгани ва унинг учувчилари ҳалок бўлгани ҳақида хабар тарқатди. Иккинчи ҳодиса расман тасдиқланмаган.
Россия бир кунда иккита Су-30 қирувчисини йўқотган бўлиши мумкин
ДВ маълумотига кўра, Россия Мудофаа вазирлиги 21-октабр куни Калининград вилоятида Су-30 ҳалокатга учраганини билдирган. Вазирлик самолёт режали ўқув-машғулот парвозини амалга ошираётганини, бортида ўқ-дори бўлмаганини ва у одамлар яшамайдиган ҳудудга қулаб тушганини айтган.
Расмий хабарда учувчилар катапулта орқали чиқишга улгургани ва эвакуация қилингани қайд этилган. Уларнинг ҳаётига хавф йўқ.
Кейинроқ уруш тарафдори россиялик блогер Кирилл Фёдоров Телеграм каналида Су-30 суратини жойлаб, бир кунда иккита самолёт йўқотилганига ишора қилган.
Россия Ҳаво-космик кучлари билан боғлиқ Фигҳтербомбер ва «Воевода вещает» каналлари ҳам иккинчи қирувчи ҳалокатга учраганини англатадиган хабарлар тарқатган. Фигҳтербомбер «Кулфат ёлғиз келмайди», деб ёзган, аммо тафсилот бермаган. «Воевода вещает» эса бу кунни Ҳаво-космик кучлари учун «ниҳоятда оғир» деб атаган.
Блогерлар берган маълумотга кўра, иккинчи самолёт экипажи ҳалок бўлган. Бироқ хабар эълон қилинган вақтда Россия Мудофаа вазирлиги бу ҳодиса юзасидан баёнот бермаган эди. Самолёт қаерда ва қандай шароитда йўқотилгани ҳам ошкор этилмаган.
Украинанинг «Мілітарний» портали гап Су-30СМ модификацияси ҳақида кетаётган бўлиши мумкинлигини тахмин қилган. Бу маълумот ҳам расман тасдиқланмаган.
Калининград вилоятида Су-30 билан боғлиқ ҳалокат аввал ҳам содир бўлган. 2023-йил августида ўқув парвозини бажараётган шу турдаги қирувчи қулаб, экипажи ҳалок бўлган эди.
ДВ Россия ҳарбий авиациясининг жанговар ҳаракатларга боғлиқ бўлмаган бошқа йўқотишларини ҳам эслатган. Жумладан, Россия Мудофаа вазирлиги маълумотига кўра, 29-сентабр куни Амур вилоятида ўқув парвози вақтида Ту-95 стратегик бомбардимончиси ҳалокатга учраб, олти нафар экипаж аъзоси ҳалок бўлган, бир киши жароҳатланган.
Шунингдек, 1-апрелга ўтар кечаси вазирлик Россия аннексия қилган Қримда Ан-26 ҳарбий-транспорт самолёти қулаганини тан олган. Ўша ҳодисада олти нафар экипаж аъзоси ва 23 йўловчи ҳалок бўлган.