Исроил Британияга Шарқий Қуддусдаги консуллигини 30 кун ичида ёпишни буюрди
Исроил Буюк Британияга Шарқий Қуддусдаги консуллигини 30 кун ичида ёпишни топширди
Исроил ҳукумати Буюк Британияни Шарқий Қуддусдаги консуллигини 30 кун ичида ёпишга мажбур қилди.
Мазкур консуллик Британиянинг Қуддус, босиб олинган Ғарбий Соҳил ва Ғазо секторидаги Фаластин масалалари бўйича ваколатхонаси ҳисобланади. Бу қарор Буюк Британия ҳамда яна 11 давлат Исроил аҳоли пунктлари билан савдони тақиқлаб, санксиялар жорий этганига жавобан қабул қилинди.
Британия ташқи ишлар вазири Эд Милибанд Исроилнинг бу қароридан афсусдалигини, бироқ бунга ҳайрон эмаслигини айтди. У Исроил ҳукуматини кўчманчи яҳудийларнинг фаластинликларга қарши зўравонлигига кўз юмаётганликда айблади.
Хабарда айтилишича, жавоб чораси сифатида қуйидаги чекловлар кучга киради: консулликда ишлаётган британиялик дипломатлар 30 кундан сўнг дипломатик мақомидан маҳрум бўлади.
АҚШ бощилигидаги мувофиқлаштириш миссиясида фаолият юритаётган британиялик мутахассислар ва Рамаллоҳдаги дипломатлар 7 кун ичида мамлакатни тарк этиши лозим.
Британияга босиб олинган Ғарбий Соҳилда Фаластин хавфсизлик кучларини тайёрлаш ҳам тақиқланади.
12 нафар британиялик депутат ва бошқа фуқаролар, жумладан Лейбористлар партиясининг собиқ раҳбари Жереми Корбиннинг Исроилга кириши ман этилади.
Исроил ташқи ишлар вазири Гидон Саар Британиянинг санксияларини “ахлоқсизлик” ва мамлакат ички ишларига аралашув деб баҳолади. У, шунингдек, мухолифатдаги Консерватив партия раҳбари Кеми Бейденокка Британия ҳукуматининг қарорини танқид қилгани учун миннатдорчилик билдирди.
Британия ва Франсия бощилигида 12 та давлат томонидан жорий этилган санксиялар босиб олинган Ғарбий Соҳилдаги Исроил аҳоли пунктларидан маҳсулот импортини тақиқлайди. Бундан ташқари, қурилиш, инфратузилма, молиялаштириш ва кўчмас мулк соҳасида хизмат кўрсатувчи компанияларга ҳам чекловлар қўйилган.
АҚШ давлат котиби Марко Рубио эса Вашингтон босиб олинган Ғарбий Соҳилда вазиятнинг беқарорлашишини истамаслигини айтди, бироқ санксиялар юзасидан аниқ муносабат билдирмади. Исроил ҳукумати яқин кунларда Британиянинг чекловларига қўшилган бошқа мамлакатларга нисбатан ҳам жавоб чораларини муҳокама қилишни режалаштирмоқда.