Ислом Махачев УФСъдаги фаолияти давомида қанча маблағ ишлаб топган?

Ислом Махачевнинг УФС фаолиятидаги даромадлари қанча?

Доғистонлик аралаш яккакураш жангчиси Ислом Махачев 15-август, шанба куни ирландиялик Ян Геррини мағлуб этиб, УФС ярим ўрта вазн тоифасидаги чемпионлик камарини муваффақиятли ҳимоя қилди. Бу 34 ёшли спортчи учун ушбу вазн тоифасидаги иккинчи жанг бўлиб, у камарни Жек Делла Маддаленага қарши баҳсда қўлга киритган эди.

Махачев УФС тарихида икки вазн тоифасида чемпион бўлган биринчи россиялик жангчи сифатида қайд этилди. Ушбу ғалаба билан у яна бир муҳим натижага эришди: кетма-кет 17 та жангда ғалаба қозониб, афсонавий Андерсон Силванинг 16 та жангдан иборат кўп йиллик рекордини янгилади. Хўш, бу тарихий ютуқлар ортидан спортчи қанча маблағ ишлаб топди?

**Фаолият давомидаги умумий даромад**

Гиве Ме Спорт ва Марса нашрларининг таҳлилларига кўра, Ислом Махачевнинг фаолияти давомида ишлаб топган умумий даромади тахминан 17,5 миллион долларни ташкил этади. Барча тўловлар, гонорарлар ва пуллик трансляциялардан (ППВ) тушган бонусларни ҳисобга олганда, у бугунги кунда УФС тарихидаги энг кўп даромад топган 10 та жангчи қаторига киради. Бу рўйхатда Конор Макгрегор 39,3 миллион доллар билан пешқадамлик қилмоқда. 2025-йил ҳолатига кўра, Махачевнинг соф бойлиги 5-7 миллион доллар атрофида баҳоланмоқда.

Махачевнинг даромадлари, айниқса, сўнгги йилларда, чемпионлик мақомига эришгач сезиларли даражада ошди. Спортй Салариес нашрининг хабар беришича, Ян Герри билан бўлган сўнгги жанг учун унинг кафолатланган гонорари 1 миллион долларни ташкил этган. ППВ фоизлари ва бонуслар ҳисобига бу сумма 3 миллион доллардан ошади.

Бундан олдин, у ярим ўрта вазнда Жек Делла Маддаленага қарши кечган баҳсда 3,32 миллион доллар ишлаб топган (800 минг доллар кафолатланган, 2,5 миллион доллар ППВ ва 32 минг доллар ҳомийлик пуллари).

Унинг фаолиятидаги энг йирик гонорар 2025-йил январ ойида қўлга киритилган. Ўшанда у жароҳат олган Арман Сарукяннинг ўрнига октагонга чиққан бразилиялик Ренато Мойканони мағлуб этиб, 3,64 миллион доллар даромад кўрган.

**14 минг доллардан чемпионликкача**

Албатта, россиялик спортчи дарҳол бундай йирик гонорарлар олишни бошламаган. У УФСъдаги дебютини 2015-йилда америкалик Лео Кунсга қарши ўтказиб, 24 минг доллар олган. Ташкилотдаги иккинчи жангида эса энг кам гонорарини (14 минг доллар) олган. Айнан шу жангда Ислом Адриану Мартинсдан нокаутга учраб, фаолиятидаги илк ва ҳозиргача ягона бўлган мағлубиятини қабул қилиб олган.

Махачев ўз фаолиятида илк бор 200 минг доллардан ортиқ гонорарни 2021-йилда Ден Ҳукерга қарши баҳсда (211 минг доллар) қўлга киритган. Кейинчалик Бобби Гринга қарши жангда ҳам худди шунча миқдорда даромад кўрган.

Исломнинг даромадлари енгил вазнда Чарлз Оливейрани мағлуб этиб, чемпион бўлганидан сўнг кескин ошиб кетди. Ушбу ғалаба унга қарийб 530 минг доллар келтирган. Кейинчалик Махачев Александр Волкановскига қарши иккита жанг орқали жами 4 миллион доллар, Дастин Порье билан тўқнашувдан эса 1,8 миллион доллар ишлаб топишга муваффақ бўлган.