Иммунитетни мустаҳкамлайди: касал бўлмасликка ёрдам берадиган 15 хил маҳсулот

**Иммунитетни кучайтиради: касал бўлмасликка ёрдам берадиган 15 та маҳсулот**

Куз — шамоллаш ва грипп авж оладиган давр. Бу пайтда бурун битиши, йўтал ва бошқа аломатлар пайдо бўлиши мумкин. Касалликни даволашдан кўра, унинг олдини олиш афзалроқ, бунинг учун эса рационингизга ҳамёнбоп маҳсулотларни қўшиш керак. Иммунитет тизимини мустаҳкамлайдиган ва вирусларга қарши курашишга ёрдам берадиган маҳсулотлар бор. Совуқ ҳавода касал бўлмаслик ва тезроқ соғайиш учун уларни истеъмол қилиш лозим.

**Ситрус мевалар**

Ситрус мевалардаги С витамини иммунитет тизимини мустаҳкамлашга ёрдам берадиган кучли антиоксидант ҳисобланади. Шу сабабли рационингизга апелсин, мандарин, лимон ва грейпфрутларни киритинг. Аммо С витамини киви, булғор қалампири, брокколи, қовоқ ва помидорда ҳам мавжуд.

**Саримсоқ ва пиёз**

Совуқ мавсумда овқатларингизга саримсоқ ва пиёз қўшиб истеъмол қилинг. Уларда антибактериал, антифунгал, антивирал, антипаразитик ва антиоксидант хусусиятларга эга аллицин бор. Бундан ташқари, саримсоқ ва пиёз С витаминининг яхши манбайи бўлиб, ичак фаолиятини яхшилашга ёрдам беради.​

**Чили қалампири**

Каен ёки чили қалампирида капсаицин моддаси мавжуд бўлиб, у яллиғланишга қарши хусусиятларга эга. Ушбу маҳсулотни истеъмол қилиш яллиғланишни камайтиришга ёрдам беради.​

**Лавлаги**

Лавлаги таркибида беталаин антиоксидантлари бор, улар инфексиядан келиб чиққан яллиғланишни камайтиришга ёрдам беради.​

**Помидор**

Помидор антиоксидант ликопенга бой. Уни бир неча ҳафта давомида истеъмол қилиш организмда инфексия пайтида юзага келадиган оксидловчи стресс даражасини пасайтиради.

**Кўкатлар**

Кўкатлар — кучли антиоксидант бўлган Э витамини манбайи. Айрим тадқиқотлар шуни кўрсатадики, рационни кунига 200 МЕ (милли эквивалент) Э витамини билан бойитиш нафас олиш йўллари инфексияларининг тез-тезлиги ва оғирлигини камайтириши мумкин.​

**Қўзиқорин**

Қўзиқоринларнинг анъанавий Хитой табобатида қўлланиши бежиз эмас, чунки бу маҳсулот ҳам антивирал хусусиятларга эга. Қўзиқоринлар организмга инфексияларга қарши туришга ёрдам берадиган Д витамини ва иммунитетни яхшилайдиган полисахаридларга бой.

**Гречка**

Гречкани овқатланиш рационига киритиш керак, чунки у антиоксидантлар, витаминлар ва минералларга, жумладан, иммунитет тизими фаолиятида жуда муҳим рол ўйнайдиган рухга бой.

**Асал**

Асал совуқ мавсумда ҳақиқий нажот ҳисобланади. У томоқ оғриғи учун энг яхши воситалардан биридир. Унинг табиий антиоксидантлари ва антимикробиал хусусиятлари вируслар, бактериялар ва замбуруғлар келтириб чиқарадиган инфексияларга қарши курашишга ёрдам беради.

Бундан ташқари, асал йўтал частотасини камайтириши ва нафас олиш йўллари фаолиятини яхшилаши мумкин. Асал уйқу сифатини яхшилаши мумкин, шунингдек, бу маҳсулот иммунитетни кўтариш учун жуда муҳим. Асал касал бўлган инсонлар учун ҳам фойдали.

**Ёғли балиқ**

Д витамини кучли иммунитетни сақлашга ёрдам беради, лосос каби ёғли балиқлар эса организмга қуёш нури етарли бўлмаганда уни синтез қилиш учун қондаги оптимал даражани сақлаб қолишга ёрдам берадиган витаминни етарли даражада ўз ичига олади. Бироқ бу ҳаммаси эмас: Д витамини захиралари саратоннинг айрим турларига қарши курашиш, суякларни мустаҳкамлаш ва ҳатто вазн йўқотишга ёрдам беради.

**Аччиқ шоколад**

Ширинликлар ҳам фойдали бўлиши мумкин. Тўқ рангли шоколадда теобромин мавжуд бўлиб, у шамоллашдан келиб чиқадиган яллиғланишни камайтиради. Меъёрида шоколад истеъмол қилиш ҳам айрим касалликларнинг олдини олади.

**Куркума**

Бу рўйхатга зираворларни ҳам қўшиш керак. Куркума таркибида яллиғланишга қарши хусусиятларга эга ва иммунитет тизимини мустаҳкамлашга ёрдам берадиган куркумин бирикмаси бор.

**Кўк чой**

Кўк чой антиоксидантларга бой ва иммунитетни мустаҳкамлашга ёрдам берадиган катехинни ўз ичига олади. Шунингдек, у вирусларнинг кўпайишини бостириши мумкин.

**Занжабилли чой**

Занжабил совуқ ҳаводаги вирусларга, айниқса шамоллашнинг энг кенг тарқалган сабаблари бўлган риновируслар оиласига қарши курашиш қобилияти билан машҳур. Шунингдек, у гингерол деб аталадиган яллиғланишга қарши компонентни ўз ичига олади, бу инфексия билан курашишга ёрдам беради.

**Кефир**

Кефир иммунитет тизимини мустаҳкамлайдиган кўплаб фойдали пробиотикларни ўз ичига олади. Бизнинг иммун тизимимиз бу пробиотиклар билан боғлиқ бўлган ошқозон-ичак тракти билан бевосита алоқадор.