Имарат Девелопмент асосчиси Марат Хамдамов фирибгарлик иши бўйича ушланди

Имарат Девелопмент асосчиси Марат Хамдамов фирибгарлик иши бўйича қўлга олинди

Имарат Девелопмент бренди остидаги қурилиш лойиҳаларига алоқадор тадбиркор Марат Хамдамов Тошкент шаҳри Ички ишлар бош бошқармаси томонидан тергов қилинаётган жиноят иши доирасида ушланган.

Идора маълумотига кўра, тергов жараёнида икки шахс — М.Х. ва Ж.А. Жиноят-процессуал кодексининг 227-моддаси асосида ушланган. Марат Хамдамов эса жиноят ишида гумонланувчи сифатида жалб этилган.

ЖПКнинг 227-моддаси суриштирувчи, терговчи ёки прокурор қарорига биноан ушлаб туришни назарда тутади. Ушланган шахс дарҳол энг яқин ички ишлар органи ёки бошқа ҳуқуқни муҳофаза қилувчи идорага олиб борилиши керак.

Хабарда бош ҳарфлари Ж.А. деб кўрсатилган иккинчи шахснинг кимлиги ошкор этилмаган. Шунингдек, ҳозирча ушланганларга айблов қўйилгани ёки кейинчалик қандай эҳтиёт чораси танланиши ҳам аниқлаштирилмаган.

1-ноябр куни Тошкент шаҳри ИИББ Тергов бошқармаси томонидан Жиноят кодексининг 168-моддаси (Фирибгарлик) ва 192−11-моддаси (Нодавлат тижорат ташкилотида ёки бошқа нодавлат ташкилотида мансабдор шахслар томонидан ваколатларни суиистеъмол қилиш) билан жиноят иши қўзғатилганди.

Бунга қурувчи фаолиятидан норози бўлиб, унинг раҳбариятига нисбатан қонуний чора кўришни сўраган хонадон харидорларининг мурожаатлари асос бўлган.

ИИББ маълумотига кўра, Имарат Девелопмент МЧЖ офиси Тошкентнинг Сергели тумани Буюк авлод кўчасида жойлашган. Аммо компания қуришни режалаштирган кўп қаватли уйлар Тошкент вилоятининг Қуйи Чирчиқ туманида қад ростламоқда.

Баъзи харидорлар уйни айнан Тошкент шаҳридан сотиб олишни кўзлаганини айтиб, обьектлар пойтахт ҳудудидан ташқарида эканидан норози бўлган. Улар шартномаларни бекор қилишни ва тўланган пулларини қайтаришни талаб қилган, бироқ ҳуқуқни муҳофаза қилувчи органлар хабарига кўра, маблағлар уларга қайтарилмаган.

Жабрланувчилар сони ва дастлабки зарар миқдори ҳозирча очиқланмаган.

Имарат Девелопмент бренди остидаги қурилиш лойиҳалари атрофидаги муаммолар жиноят иши қўзғатилишидан анча олдин жамоатчилик муҳокамасига сабаб бўлганди.

2025-йилнинг декабрида Дарё нашри шартномани бекор қилгандан кейин на хонадонни ололган ва на пулларини қайтара олган харидорлар ҳақида суриштирув эълон қилганди.

Мижозлардан бири 2024-йил январида Сергели Ситй лойиҳасидаги хонадон учун 100 миллион сўм тўлаганини айтган. Унинг сўзларига кўра, менежер турар жой Тошкентнинг Сергели туманидан тахминан беш километр узоқликда жойлашишини билдирган. Бироқ қурилиш майдонига бориб кўрган харидор обьект анча узоқда — Тошкент вилояти ҳудудида жойлашганини билиб қолган.

Бошқа харидорлар ҳам қурилиш ишлари кечикаётгани ва тўловлар узоқ вақт давомида қайтарилмаётганидан шикоят қилган.

2025-йилнинг июлида Қурилиш ва уй-жой коммунал хўжалиги соҳасида назорат қилиш инспексияси Қуйи Чирчиқ туманидаги Сергели Ситй мажмуасининг бешта блоки қурилишида қоидабузарликларни аниқлаган. Улар орасида қурилиш-монтаж ишларини бошлаш учун тегишли рўйхатдан ўтмаслик, бетон устунлардаги бўшлиқлар, пойдевор остида сув тўпланиб қолиши ҳамда лойиҳада кўзда тутилган дренаж тизимининг йўқлиги каби ҳолатлар қайд этилган. Ушбу блоклар қурилиши вақтинча тўхтатилган эди.

2026-йил октабр ойи охирида Kun.uz харидорларнинг шартномада кўрсатилган муддатларда уйларни топшириш шартлари бузилаётгани ҳақидаги мурожаатларини яна эълон қилди.

Шу шикоятлар фонида Марат Хамдамов компаниянинг бошқа таъсисчилари билан ўртасидаги низо ҳақида видеомурожаатлар чиқарди. Унинг таъкидлашича, шериклари уни Сергели Ситй ва Бристол Ситй лойиҳаларидан четлатиб, офис ва қурилиш майдончаларига киришига тўсқинлик қилган. Шунингдек, у ўзига ва оила аъзоларига таҳдидлар бўлаётганини ҳам маълум қилган.