Ҳужжатларнинг кўрсатишича, МРБ 11 сентябрь воқеаларидан бир неча йил олдин «портловчи самолёт» таҳдидидан огоҳлантирган
Жосуслык агентлиги махфийликдан чиқарилган 71 та президентлик брифингларини эълон қилди, улардан бирида Ал-Қоиданинг режалари экстремистлар орасида «кенг маълум» бўлган деб ҳисоблангани кўрсатилган.
Ҳужжатларнинг кўрсатишича, МРБ 11 сентябрь воқеаларидан йиллар олдин «портловчи самолёт» таҳдидидан огоҳлантирган
МРБнинг президентлар Билл Клинтон ва Жорж Бушга йўллаган огоҳлантиришлари АҚШда яқинлашиб келаётган ҳужум ҳақида қайта-қайта огоҳлантирилганини кўрсатади
Яқинда махфийликдан чиқарилган ҳужжатлар шуни кўрсатадики, 11 сентябрь воқеаларидан уч йил олдин АҚШ разведка расмийлари «Ал-Қоида» «АҚШ шаҳарларидан бирига портловчи моддалар билан тўлдирилган самолётни учириши» мумкинлигини муҳокама қилишган.
Жума куни, олиб қочиб кетилган самолётлар Жаҳон савдо маркази, Пентагон ва Пенсильваниядаги далага қулаганининг 25 йиллигида, МРБ 1998 йил бошидан то ҳужумларнинг эртаси кунигача бўлган даврни қамраб олувчи 71 та кундалик президентлик брифингларини эълон қилди.
2001 йил 12 сентябрдаги бошқа бир ҳужжатда айтилишича, фитнанинг мавжудлиги экстремистик доираларда «кенг маълум» бўлган.
Президентнинг кундалик брифинглари АҚШ ҳукуматидаги энг махфий разведка таҳлиллари сирасига киради ва одатда нашр этилганидан кейин 40 ёки 50 йил давомида махфий бўлиб қолади.
«Йигирма беш йил олдин, 11 сентябрь ҳужумлари миллатимизга зарба берди, аммо улар бизни синдира олмади», деди МРБ директори Жон Рэтклифф ўз баёнотида.
«Ўшандан бери МРБ ходимларининг авлодлари ҳалок бўлган америкаликларимиз учун адолатни таъминлаш ва „Ал-Қоида“ ҳеч қачон мамлакатимизга қайта зарар етказа олмаслигини таъминлашга ўз фаолиятларини бағишладилар», дея қўшимча қилди у.
МРБ томонидан эълон қилинган 71 та ҳужжатдан 69 таси жамоатчиликка ҳеч қачон кўрсатилмаган.
Брифинглар — уларнинг аксарияти ҳали ҳам қаттиқ таҳрир қилинган (айрим қисмлари ўчирилган) — Клинтон ва Буш маъмуриятлари даврида яратилган.
Улар «Ал-Қоида» тармоғи ва унинг раҳбари Усама бин Лодинга нисбатан хавотирнинг кучайиб бораётганини кўрсатади. Улар, шунингдек, ўша куни содир бўлган воқеаларни ўрганган расмий комиссиянинг хулосасини такрорлайди: АҚШ разведкаси эҳтимолий ҳужум ҳақида қайта-қайта огоҳлантирган, аммо келаётган хавфнинг кўлами ҳақида аниқ тафсилотлар ёки тушунчага эга бўлмаган.
1998 йил 10 сентябрдаги брифинг ҳужжатларидан бирида Бин Лодиннинг зарба бериш учун афзал кўрган жойи АҚШ ҳудудида эканлиги, Вашингтон эса асосий нишон бўлгани хабар қилинган.
МРБ таҳлилчиси ёзишича, гуруҳ «АҚШ шаҳарларидан бирига портловчи моддалар билан тўлдирилган самолётни учириши» мумкин.
11 сентябрь комиссиясининг 2004 йилдаги ҳисоботида АҚШ разведкаси «Ал-Қоида» ҳужумда самолётдан фойдаланишни кўриб чиқаётганига ишонгани қайд этилган бўлса-да, бу огоҳлантириш ўша пайтдаги президент Билл Клинтонга етиб борган-бормагани ҳеч қачон аниқ бўлмаган.
Бин Лодин ва «Ал-Қоида» 1998 йилдаёқ АҚШ разведка ҳамжамиятига яхши маълум эди.
Ўша йилнинг август ойида улар АҚШнинг Кения ва Танзаниядаги элчихоналарига ҳужум қилиб, 224 кишининг ҳаётига зомин бўлишди ва бу АҚШни Афғонистон ва Судандаги нишонларга қанотли ракеталар билан зарба беришга ундади.
1998 йил 28 августда — элчихоналарга қилинган ҳужумлардан 21 кун ўтиб ва АҚШнинг жавоб зарбасидан саккиз кун ўтиб ёзилган ҳужжатлардан бири тармоқ бутунлигича қолаётгани ва Бин Лодин фаол равишда «АҚШда ҳужумлар уюштиришни кўриб чиқаётгани» ҳақида огоҳлантирган.
Эълон қилинган президентлик брифингларидан фақат биттаси ҳужумлардан кейинги даврга тегишли. У Оқ уйга 12 сентябрь куни соат 04:00 да, биринчи самолёт Нью-Йоркдаги Жаҳон савдо марказига урилганидан сал кам 20 соат ўтгач юборилган.
Ҳисоботда қайд этилишича, «кўпайиб бораётган далиллар» Афғонистон ва Форс кўрфазидаги экстремистлар ҳужумнинг яқинлашиб қолганидан «хабардор бўлишганини» кўрсатган.
Қисман таҳрир қилинган бошқа бир жумлада айтилишича, фитна экстремистлар орасида «кенг маълум» бўлган ва Бин Лодин ушбу режа туфайли «тўқнашиб қолган» Афғонистоннинг Толибон ҳукмдорлари билан низолардан қочиш учун Кобулга кўчиб ўтган бўлиши мумкин.
Толибоннинг ўша пайтдаги раҳбари Мулла Омар ҳужумлардан сўнг дарҳол оиласи билан Афғонистон жанубидаги Қандаҳор шаҳридан эвакуация қилингани хабар қилинган. Орадан бир ой ўтмай, АҚШ ва унинг иттифоқчилари «Ал-Қоида»ни йўқ қилиш мақсадида Афғонистонга бостириб киришди.