“Гранатани атайин портлатиб, урушдан қочдим”. Россия армияси сафида бўлган самарқандлик эркак судланди
“Гранатани атайин портлатиб, урушдан қочдим”. Россия армияси сафида бўлган самарқандлик эркак судланди
Жиноят ишлари бўйича Самарқанд туман суди чиқарган ҳукмга кўра, Россия Қуролли кучлари таркибида Украинага қарши урушда қатнашган самарқандлик 30 ёшли эркакнинг озодлиги 4 йилга чекланган.
Паяриқ туманида истиқомат қилувчи И.А. 2022-йил июн ойида ишлаш мақсадида Россияга боргани, Москва вилоятининг Подолск ва Балашиха шаҳарларида қурилиш ҳамда етказиб бериш ишлари билан шуғуллангани айтилади. 2025-йил июлида Балашихада курьерлик қилаётган пайтида йўлда скутерга урилиб йиқилган. Шу вақтда фуқаролик кийимидаги икки киши уни уриб, сумкасини текширган ва ичидаги турли рангдаги таблеткаларни психотроп модда сифатида кўрсатган.
И.А. таблеткалар ўзига тегишли эмаслигини билдирган бўлса ҳам, нотаниш шахслар уни Москвадаги ҳуқуқни муҳофаза қилувчи идоралардан бирига олиб кетишган.
“Идорага боргандан кейин бир кун қўл-оёғим боғлиқ ҳолда сақландим. Кейин бир ҳафтага яқин ҳар куни психотроп моддаларни кимдан олганим бўйича сўроқ қилишди. Менга тегишли эмаслигини айцам-да, ишонмасдан турли хил йўллар билан қийнашарди. Охири улар менга жазодан қутулиш эвазига бир йил ҳарбий полигон қурилишида ишлаш таклифини беришди. Қурилишда ишлаганим учун бунга рози бўлдим”, дейди И.А. ўз кўрсатувида.
Бироқ кейинги воқеалар бошқача кечган. Уни ўша куниёқ Москвадаги мудофаа бўлимига олиб боришган. И.А. рус тилидаги ҳужжатларнинг мазмунини тушунмаган ҳолда уларга имзо қўйган. Улар орасида Россия Қуролли кучлари билан ҳарбий хизмат шартномаси ҳам бўлган. Тиббий кўрикдан сўнг уни “Авангард” ҳарбий масканига олиб боришган. У ерда автомат ва гранатадан фойдаланиш ўргатилган, картасига 2 млн рубл тушириб берилган.
Шундан кейин 1-сентябр куни И.А. аввал Воронеж шаҳрига, сўнг Луганск ҳудудидаги Белолуцк шаҳрида жойлашган 12-танк полкига олиб борилган. 28 сентябр куни фронт ҳудудига юборилиб, блиндажга жойлаштирилган.
3-октябр куни дрон ҳужуми пайтида урушдан қутулиш мақсадида гранатани атайин портлатиб, чап оёғини жароҳатлаган. Шундан кейин аввал Белолуцк, сўнг Белгороддаги госпиталларда даволанган.
“Урушдан қочишнинг бошқа йўлини тополмасдан ўзимда мавжуд гранатани атайин портлатишга мажбур бўлдим. Оқибатда чап оёғим жароҳатланиб, даволаниш учун госпиталларга юборилдим. Кейинчалик Москвага олиб боришди”, дейди И.А.
Москвада у 6-ноябрдан пул эвазига меҳнат таътилига чиққан. 26-ноябрда эса ҳарбий қисмга қайтмасдан Ўзбекистонга қочиб келган. Бироқ қайтганидан кейин урушда қатнашгани ҳақида тегишли ҳуқуқни муҳофаза қилувчи органларга хабар бермаган.
Судда И.A.ning онаси унинг отаси 1999-йилда ички ишлар органларида хизмат вазифасини бажариш вақтида вафот этгани, тиббий ёрдамга муҳтожлиги ҳамда укаси 2026-йил январда ишлаш учун Россияга кетиб, бедарак йўқолгани, уни топиш учун Интерполга ҳам мурожаат қилинганини билдириб, енгиллик сўраган.
Суд ҳукми билан И.А. Жиноят кодексининг 154-моддаси 1-қисми (Ёлланиш) билан айбдор деб топилиб, унга 4-йил муддатга озодликни чеклаш жазоси тайинланган.