Гавҳар Зокирова: “Жамшид акам билан турмуш қуришимизда Авлонийнинг авлоди эканим қўл келган”
Гавҳар Зокирова: “Жамшид акам билан турмуш қуришимизда Авлонийнинг авлоди эканим қўл келган”
Ўзбекистон халқ артисти, актриса Гавҳар Зокирова “Менинг юртим” телеканалининг “Ўзимизнинг гап” кўрсатувида меҳмон бўлди. Суҳбат чоғида у Абдулла Авлонийнинг авлоди экани турмуш қуришида муҳим аҳамият касб этгани, келинлик сарпосида қимматбаҳо буюмлар ўрнига китоблар бўлгани ҳамда Авлонийнинг рафиқаси билан шахсан таниш бўлгани ҳақида сўзлаб берди.
“Жамшид ака билан турмуш қуришимизда Авлоний авлоди эканим ёрдам берган”
— Турмуш ўртоғим Жамшид Зокиров билан оила қуришимизда бобом Абдулла Авлоний номининг ўзига яраша ҳиссаси бўлган. Жамшид ака билан турмуш қуришга аҳд қилганимиздан кейин илк бор онасига бу ҳақда айтганида, қайнонамга ёқмаган эканман. Суратимни кўриб, мени ўзбек эмас деб ўйлагани сабабли тўйга қаршилик қилган экан. Шунда Жамшид ака “бу қиз — Абдулла Авлонийнинг эвараси”, деган.
Ҳаётда ҳеч нарса шунчаки бўлмайди, ҳамма нарсанинг ўз ўрни бор. Айнан шу куни қайнотамнинг қариндошлари уларникига меҳмонга келган бўлган. Авлонийнинг эвараси эканимни билишганидан сўнг ҳайрон қолишган. Жамшид аканинг аммаси қайнонамга “шу қизни келин қилмасангиз, кимни келин қиласиз?”, деган экан. Сўнг қайнонам ўйланиб қолиб, розилик берган. Қайнонам жуда шартаки аёл бўлган.
Кейинчалик ҳам бутун умрим давомида бобомнинг номи ҳаётим билан чамбарчас боғлиқ бўлиб келди.
“Сепимда қиммат идишлар эмас, китобларни юборганман”
— Сепимда китобларимни юборганман. Қайнонам ва унинг яна бир қариндоши буни кўриб “қизнинг онаси эринмаган аёл экан. Қизига шунча идиш-товоқларни йиғиб қўйибди. Зўрларидан бўлса керак”, деган. Бориб, секин қутиларни очиб кўриб, “вой, шўрим қурсин, ҳаммасида китоб экан”, деган.
Биз акам билан Эрнест Ҳемингуейнинг асарлари, китобларини, суратини йиғишни яхши кўрардик. Болалар катта портрет кўтариб келишаётганда қайнонам Ҳемингуейнинг суратини кўриб, “Вой-бў, Авлонийни қаранг, соқоллари узун, нуроний киши бўлган экан”, деган экан.
“Авлонийнинг аёлини кўрганман”
— Аслида оиламизда Авлоний ҳақида кўп гапирилмас эди. Бўлмаса, Авлонийнинг рафиқаси Саломат бувини институтни тугатгунимга қадар кўриб, у киши билан суҳбатда бўлганман. Бувининг олдига Жамшид акамни ҳам олиб борганман.
“Буюк эркакнинг ортида буюк аёли туради”, деган гап бекорга айтилмаган экан. Абдулла Авлоний 1934-йилда оламдан ўтганидан сўнг профессор Бегали Қосимов бобомнинг хонадонига келиб, Авлонийнинг биринчи китобини арабчадан кириллчага ўгириб, соатлаб ўтириб ёзарди. Саломат буви китобнинг бирорта варағини ҳам у кишига олиб кетиб, ёзиб келиш учун бериб юбормас эди. Бегали Қосимов уч йил давомида Саломат бувининг хонадонига қатнаб, китобни кириллчага ўгирган экан. Бувим қатағон йилларида, 1934-йилдан то 1966-йилгача бобомнинг ҳамма китобларини чордоқда беркитиб сақлаб келган. Шу сабабли Чўлпон, Қодирийнинг китобларини ёқиб юборишган пайтда бобомнинг деярли барча китоблари сақлаб қолинган, дейди Гавҳар Зокирова.