“Қамоқхонада ўтирганимда Юлдуз Усмонова кўришга келган”. Гиёҳванд модда сабаб қамалган ва бир неча марта ўлимдан қолган хонанда Абдулла Қурбонов 50 ёшда
“Қамоқхонада ўтирганимда Юлдуз Усмонова кўришга келган”. Гиёҳванд модда сабаб қамалган ва бир неча марта ўлимдан қолган хонанда Абдулла Қурбонов 50 ёшда
“Онажоним” қўшиғи билан кўплаб оналарнинг меҳрини қозонган, ўзбек санъатининг узоқ йиллик вакилларидан бири бўлган хонанда Абдулла Қурбонов 2-сентябр куни 50 ёшга тўлди. Ёшлигидан Муҳриддин Холиқов, Фаррух Зокировлар қўлида мусиқа сирларини ўрганган, суиқасддан омон қолган, гиёҳванд моддалар билан қўлга тушиб, бир неча йилини қамоқхонада ўтказган санъаткорнинг ижоди ва ҳаёт йўлига назар ташлаймиз.
“Муҳриддин Холиқов шарт қўйган”
Серфарзанд оилада 9 нафар ўғил-қиз вояга етган. Улар орасида Абдулла Қурбонов ҳам бор эди. Оиласида санъаткорлар бўлмаса-да, у болалигидан санъатга ошно бўлган. У илк бор 1987-йилда акаси Дониёр Қурбоновнинг тўйида микрофон олиб қўшиқ куйлаган. Уни зимдан кузатиб турган хонанда Муҳриддин Холиқовдан ёш йигитни шогирдликка олиш сўралади. “Бир шартим бор, агар ъАраб тангосиъни ижро этишни уддаласа, уни шогирдликка оламан”, деган жавобни олгач, ёш Абдулла қўшиқни қунт билан ўрганади. Муҳриддин Холиқов уни шогирдликка олиб, тўй-хизматларига ўзи билан олиб юради.
Иштироким кўпчиликка маъқул бўлган. Муҳриддин Холиқовнинг дуоларини олиб, Фаррух Зокировга қўнғироқ қилганман. “Мени шогирдликка олинг”, деганман. Ўша пайтларда Фаррух Зокиров ва “Ялла” гуруҳининг номи бутун дунёга танилган, машҳурлик борасида уларга тенг келадиган хонанда кам эди. Муҳриддин Холиқовнинг маслаҳатига кириб, “Араб тангоси”ни ўрганганим қўл келган ва 1991-йилда Фаррух Зокиров жамоасига шогирдликка қабул қилинганман. Беш йил давомида қўшиқчилик сирларини ўрганиб, “Ялла”нинг кўплаб консертларида қатнашганман, дейди Абдулла Қурбонов.
“Бойиб кецам, онамни ишлатмайман”
Абдулла Қурбонов қийинчиликлар ичида ўтган болалик йилларини шундай эслайди.
— Катта рўзғорни тебратиш осон бўлмаган. Кейинчалик отам новвойчиликни ташлаб, таксопаркка ишга кирган. “Сариқ сигирни соғиб, сизларни боққанман”, деса сигиримиз йўқ-ку, деб ҳайрон бўлардим. Кейин билсам, дадам сариқ сигир деганда такси машинасини назарда тутган экан. Онам эса рўзғор ишларидан ортиб, новвойчилик ҳам қиларди. Мен уларни бозорга олиб чиқиб сотардим. 50 та нон ёпиш учун оташ-олов бўлиб ёнаётган тандирга шунча марта кириб-чиқишга тўғри келарди. “Бойиб кецам, онамни ишлатмайман”, деб ният қилардим. Шукрки, уларнинг бари амалга ошди, дейди хонанда.
“Машинам думалаб кетган”
2002-йилда Абдулла Қурбонов автоҳалокатга учраб, жиддий жароҳат олади. Хонанда бу ҳолатни суиқасд деб баҳолайди.
Тўқнашувдан сақланиб, рулни бурганимда машинам думалаб кетди. “Москвич”да ўтирган тўрт йигитнинг ҳеч бири ёрдам бермай, кўздан ғойиб бўлишган. Уюштирилмаган бўлса, уларга зарар етказмаслик учун жонимизни хавфга қўйганим эвазига ёрдам бериши керак эмасми?, дейди хонанда.
“Тан оламан, авваллари чекканман”
Хонанда гиёҳванд модда сабаб озодликдан маҳрум этилган. Санъаткорнинг айтишича, яқин танишларидан бири уни тўйга чақириш баҳонасида уйига меҳмонга келганида, қўшиқчининг рад этишига қарамай, унга гиёҳванд моддани “ҳадя тариқасида” берган.
Абдулла Қурбонов авваллари “бу нарса”ни тўйларда, улфатлар билан ўтиришларда қабул қилганини тан олган, бироқ ўша пайтда ташлаганини, соғлиғи ҳам кўтармаслигини таъкидлаган.
Тан олишим керак, олдинлари чеккан бўлсам, чекканман. Лекин мен уларга буни олиб келинглар демаганман, буни залда ҳам (суд залида) айтганман. Аммо қонун ҳамма учун бир хил экан. Гиёҳванд модда сабаб қамалганман, дейди Абдулла Қурбонов.
“Қамоқхонага Юлдуз Усмонова келган”
Хонанда Қашқадарёдаги жазони ижро этиш муассасасида муддатини ўтаётганида фақат Юлдуз Усмонова уни кўргани боргани ва унинг гаплари катта куч бергани ҳақида сўзлаб берган.
— Шунча санъаткорларнинг ичида Юлдуз Усмонованинг мард тарафларидан бири — қамоқда эканимда мени кўргани боргани.
Қамоқхонага бориб, раҳбарларни чақириб, “шу бола менинг боламдай, менинг укам, мен энг яхши кўрган санъаткорлардан биттаси бу, унга эътиборни жиддийроқ қилинглар, бу ҳали халққа керак. Ҳар хил гап-сўзлар эшитяпмиз, ишқилиб болага тазьиқлар йўқми, ҳеч қанақа зулмлар йўқми?”, деб мендан хабар олишга борган.
Тўғрисида, қўрққан. Одамлардан эмас, Худодан қўрқишсин! Ўша пайт Юлдуз опа ҳеч нимадан қайтмасдан Қашқадарёга жамоа билан борган экан. Менинг қайси қамоқхонада эканлигимни суриштиришган.
Мени раҳбарият чақириб, “Юлдуз Усмонова сенга ким бўлади?”, деб савол берганида мен хавотирда бўлдим. Нима бало, опамга ҳам бир нарса бўлганмикан, деган ўйда турганимда, “Ўйлама, қўрқма, хавотир олма. У одамга ҳеч қанақа ёмонлик қилмаймиз, тўғри маънода сўраяпмиз, ким бўлади?”, деганида, мен “Опам бўлади, ҳурмат қиламан, нима гап?” десам, “Шу ерга келди, лекин қонун доирасида учраштириш мумкин эмас, негаки, фамилия тўғри келмайди. Фақатгина оилангга рухсат, бошқаларга мумкин эмас деган қонун бор”, дейишганда улар ҳам, опа ҳам тўғри тушунган.
“Майли, фақат менинг шахсий илтимосим, менинг келганимни айтиб, менинг номимдан икки оғиз ҳол-аҳволини сўраб қўйинглар”, деганлари катта эътибор. Кўряпсизми эътиборни? Менга жонлари ачиб, нима учун борган, қайсидир жиҳатим опага хуш келган, қайсидир характеримни яхши кўрган. Аёл боши билан, унча-мунча эркак киши қилмаган меҳрни берган шу одам. Шунинг учун ҳам опани яхши кўраман, дейди Абдулла Қурбонов.
“Қамоқхонадаги уч йил”
Хонанда кўплаб суҳбатларида автоҳалокатга учраган ёки қамалган пайтида ҳам аёли ва онасининг далдаси катта куч бергани ҳақида айтиб ўтган.
Бундай пайтда онамнинг дуоси ва рафиқамнинг қўллаб-қувватлаши менга куч бағишлади, дейди хонанда.
“Бир ўлимдан қолганман”
Хонанда интервюларининг бирида бир ўлимдан қолгани ҳақида ҳам сўзлаб берган.
Бошимга тушган синов ҳақида ҳам “Беайб Парвардигор, ҳар бандада бир айб бор. Менинг айбим тўқлигимдир, тўқлигимдан шўхлигимдир” мисрали қўшиқ тайёрлаганман. Бир ёмоннинг яхшиси бор. 2013-йилда чет элда яшайдиган дўстим Жалолиддин билан қўнғироқлашдим, октябрда икковимиз оиламиз билан бир ой кемада сайр қилишга келишдик. Рафиқам, тўрт фарзандимни олиб, Флоридадаги Диснейлендга олиб боришни ҳам режа қилиб, бир йилга виза олдик. Лекин 27-август тарих зарварақларида эмас, юрагимда ўчмас доғ бўлиб қолди. Ўша санада менга нисбатан жиноий иш очилиб, чет элга боролмаганмиз... Радиода эса биз сайр қилишни режа қилган кема ҳалокатга учраганини эшитдим, оилам билан бир ўлимдан қолганман-да, дейди хонанда.
Муҳокамалар марказидаги хонанда
Бундан бир неча йил аввал қиш ойларида қўшиқчининг ички ишлар бошқармасида безорилик қилаётгани ҳақидаги видео тарқалди. Қурбоновнинг сўзларига кўра, у Бўстонлиқдаги тўйдан кейин кафега бориб, спиртли ичимлик истеъмол қилган ва жанжалда қатнашган ҳамда 10 суткалик жазога тортилган.
Ички ишлар ходимларини ҳақоратлагани ҳам кўплаб муҳокамаларга сабаб бўлган.
Оиласи ҳақида
Ҳозирча фақат тўнғич ўғли Музаффар Қурбонов отасининг касбини давом эттириб, санъатда фаолият юритмоқда. Аммо ҳозирча ижодида ўзига хослик сезилгани йўқ.
Абдулла Қурбонов ўғли Музаффарни 2022-йил сентябр ойида уйлантирди. Хонанданинг фарзандининг никоҳ оқшомига йиғилган шоу-бизнес вакиллари, санъаткорларнинг устидан доллар сочгани ижтимоий тармоқларда тарқалиб, кўплаб муҳокамаларга сабаб бўлган.
Орадан бир йил ўтиб хонанда боболик мақомига эришди. Музаффар Қурбонов қиз фарзандли бўлди.
Ҳозирда Абдулла Қурбоновнинг ўзи ҳам ижодда анча сокинлашган, ора-сира гала консертларда кўриниш беради.