Франция музейидан ўғирланган Ренуарнинг иккита картинаси қайтарилди
Ўғрилар Француз Ривьерасидаги Ренуар музейи панжарасини кесиб, деразасини синдириб кирган ўтган ойда ушбу икки асар ўғирлаб кетилган эди.
Франция музейидан ўғирланган иккита Ренуар картинаси топилди
«Қудуқ ёнидаги қиз» (Jeune fille au puits) ва «Мадам Колонна Романо портрети» (Portrait of Madame Colonna Romano) асарлари ўтган ойда ўғирланган эди
Франция жанубидаги музейдан бир ой олдин олиб кетилган Огюст Ренуарнинг иккита картинаси топилди, деб хабар берди маҳаллий мэрия.
Икки асар 8 сентябрь куни ўғрилар француз импрессионисти умрининг сўнгги йилларини ўтказган Кань-сюр-Мердаги Ренуар музейи панжарасини кесиб, деразасини синдириб кирганидан кейин ўғирланган эди.
Маҳаллий мэр картиналарни қайтаргани учун расмийларга миннатдорчилик билдирди ва бу хабар улкан қувонч ҳамда енгиллик олиб келганини айтди.
Ренуар музейидаги ўғриликка алоқадорликда гумон қилиниб, олти киши ҳибсга олинган, дея тасдиқлади мэрия ўз баёнотида.
Ушбу ўғрилик Европадаги шов-шувли санъат асарлари ўғриликлари занжирининг сўнггиси бўлди.
Йўқолган икки картина «Мадам Колонна Романо портрети» (1910) ва «Қудуқ ёнидаги қиз» (1886) асарлари эди.
Ўғрилар музей ичидаги ромларни кесиб олиш учун электр аррадан фойдаланишган ва дастлаб тўртта картина билан қочиб кетишган, бироқ қочиш чоғида улардан иккитасини музей боғига тушириб қолдиришган.
«Бу икки картина санъат асари бўлишдан анча юқори туради. Улар шаҳримиз тарихининг, маданий меросимизнинг ва Огюст Ренуар Кань-сюр-Мерга қолдирган мероснинг бир қисмидир», деди Франциянинг «Миллий бирлашув» партияси аъзоси бўлган мэр Брайан Массон.
Уларнинг қандай қилиб топилгани ҳақидаги батафсил маълумотлар жума куни кечроқ маълум қилиниши керак эди.
Ренуар музейида машҳур рассомнинг 12 та асари сақланади.
1960 йилда очилган музейда бир вақтлар унга тегишли бўлган бир қатор буюмлар, жумладан, унинг мўйқалам тахтаси (мольберт) ва ногиронлар аравачаси, шунингдек, фотосуратлар ва шахсий хатлар мавжуд.
Шу йил бошида Италиянинг Парма шаҳри яқинидаги музейдан Ренуар, Поль Сезанн ва Анри Матисснинг картиналари атиги уч дақиқа давом этган босқинчилик пайтида ўғирланган эди. Улар август ойида топилди.
Франция сўнгги йиллардаги энг йирик санъат ўғрилигини ўтган йилнинг октябрь ойида, Парижнинг Лувр музейидан кундузи тож қимматбаҳо тошлари ўғирланганида бошдан кечирган эди.
Қурилиш ишчилари қиёфасидаги ўғрилар музейнинг иш вақтида Луврнинг биринчи қаватидаги Аполлон галереясига бостириб киришган.
Улар витриналарни очиш учун бурчак силлиқлаш машинасидан (болгарка) фойдаланишган ва бир вақтлар Франциянинг XIX асрдаги қироличалари ва императрицаларига тегишли бўлган 88 миллион евролик (78 миллион фунт стерлинг) заргарлик буюмлари билан қочиб кетишган.
Кейинчалик Лувр хавфсизликка етарлича маблағ ажратмагани учун танқид қилинган эди.