Франсиядаги музейдан 9 млн евролик санъат асарлари ўғирлаб кетилди (фото)
Франсиядаги музейдан 9 млн евролик санъат асарлари ўғирлаб кетилди (фото)
Франсияда ўғрилар Ренуар музейидан умумий қиймати 9 миллион еврога тенг бўлган учта расмни олиб кетди. Бу ҳақда Кан-Сюр-Мер шаҳри мери Браян Массонга таяниб АБС Невс хабар берди.
Икки нафар ўғри 8-сентябр куни франсуз импрессионист рассоми Пер-Огюст Ренуарга бағишланган музейга бостириб кирган. Улар тўртта санъат асарини ўғирлаган, бироқ қочиб кетаётганда биттасини ташлаб кетган.
Маҳаллий Нисе-Матин газетаси ўғирланган расмлар Мадам Пичон портрети (1895), Мадам Солонна Романо портрети (1910), Сосо Лисант (1905) ва Жеуне филле ау пуиц (1886) эканини ёзмоқда. Шаҳар мерияси ўғирланган асарларнинг қийматини 9 миллион еврога (14,5 миллион доллар) баҳолаган.
“Шаҳарнинг видеокузатув камераларига тушган икки киши қочиш чоғида расмлардан бирини ташлаб кетган”, деди Браян Массон.
Музей сигнализацияси соат 5:48 да ишга тушган. Орадан атиги беш дақиқа ўтиб, шаҳар полицияси воқеа жойига етиб келган. Гумондорлар қидирилмоқда, тергов давом этмоқда.
Ренуар музейи 1960-йилда рассомнинг 1919-йилдаги вафотидан олдин яшаган уйида ташкил этилган. Унинг коллексиясида Ренуарга тегишли бўлган буюмлар ва мебеллар, жумладан, унинг молберти, ногиронлар аравачаси, рассом томонидан чизилган портретлар, пейзажлар ва нюд суратлар бор.
Бу ўғирлик Париждаги Лувр музейидан кундузи тахминан 88 миллион евро қийматидаги заргарлик буюмлари ўғирланганидан бир йил ўтмай юз берди. Луврни талон-торож қилишда гумон қилинган тўрт киши ушланган. Бироқ халқаро ҳамкорликка қарамай, ўғирланган буюмлар ҳануз топилмаган.
Март ойида Италиядаги музейдан Пьер-Огюст Ренуар, Пол Сезанн ва Анри Матисснинг учта асари ўғирлаб кетилганди. Икки ой ўтиб, картиналар гумондорлардан бирининг уйидан топилган. Улар топилганидан бир неча кун ўтиб, Италиядаги бошқа бир музейдан яна тўртта картина ўғирлаб кетилганди.