Эроннинг янги мудофаа вазири Меҳрдод Ахлоқий ким?
Ахлоқийнинг тажрибаси асосан баллистик ракеталар, аерокосмик технологиялар ва мудофаа-саноат ишлаб чиқариши соҳаларида тўпланган.
Эроннинг янги мудофаа вазири Меҳрдод Ахлоқий ким?
Меҳрдод Ахлоқий Китобчи Эрон мудофаа ва қуролли кучларни таъминлаш вазири лавозимига тайинланди. 18-октабр куни Эрон парламенти онлайн йиғилишда 68 ёшли Ахлоқийнинг номзодини тасдиқлади.
Бу қарор АҚШ ва Исроилнинг Эронга қарши уруши янада кучайиши кутилаётган бир вақтда қабул қилинди.
Эроннинг собиқ мудофаа вазири Азиз Насирзода урушнинг биринчи куни — 28-февралда Исроил зарбалари натижасида ҳалок бўлганди. Ўша куни Олий раҳбар Али Хоминаий ва бошқа кўплаб юқори мартабали эронлик шахслар ҳам ҳалок бўлганди.
Шундан бери бу лавозимни вақтинча Мажид Ибн Ризо эгаллаб келаётганди. Эндиликда у Ахлоқийнинг ўринбосари бўлади.
Ярим йилдан ошган уруш давомида АҚШ ва Исроил Эроннинг ҳарбий-саноат инфратузилмасига жиддий зарбалар берган.
Янги вазирнинг мудофаа режалари бундан олдин юқори ҳарбий раҳбарият, Эрон президенти Масъуд Пезешкиён ва парламентнинг Миллий хавфсизлик ва ташқи сиёсат комиссияси томонидан маъқулланган.
«Эрон Ислом Республикаси ҳеч бир давлатга қарши тажовузни бошлаб берувчи томон бўлмайди. Бироқ ҳар қандай тажовузга қарши мамлакатнинг ҳудудий яхлитлигини қатъият билан ва ўлимгача ҳимоя қилади»
Президентнинг сўзларига кўра, Ахлоқий мудофаа вазирлиги ва унга алоқадор ташкилотларда 42 йилдан ортиқ тажрибага эга.
Унинг асосий ихтисослиги баллистик ракеталар, қаттиқ ёқилғили двигател тизимлари, аерокосмик технологиялар ва ҳарбий-саноат ишлаб чиқаришидир. У аввал Эрондаги қурол ишлаб чиқарувчи учта ташкилотга раҳбарлик қилган. Ахлоқий ва бу тузилмалар АҚШ санксиялари остида.