Ироқ Эрон томонидан қўллаб-қувватланадиган қуролли гуруҳлар қачон қуролсизлантирилишини маълум қилди
Ироқ Эрон томонидан қўллаб-қувватланадиган қуролли гуруҳлар қачон қуролсизлантирилишини маълум қилди
Ироқ бош вазири Али аз-Заидий Бағдод Эрон билан алоқадор қуролли гуруҳларни қуролсизлантириш жараёнини 2027-йил июнигача якунлашини айтди. Шу билан мамлакатдаги кучли қуролли тузилмаларни ҳукумат назоратига олиш учун муддат белгиланди.
Аз-Заидий Тҳе Нев Ёрк Тимес нашрига берган интервюсида таклиф этилган режанинг тафсилотларини очиб берди. Унинг айтишича, қуролли гуруҳлар аввал 90 кун давомида ҳеч қандай ҳужум уюштирмаслиги керак. Бунинг эвазига уларга АҚШ кучлари томонидан нишонга олинмаслик кафолати берилади.
Кейин гуруҳлар қуролларини топширишни бошлайди. Ҳукумат бу жараённи 2027-йил 30-июнгача тўлиқ тугатишни режалаштирмоқда. Бироқ НЙТ хабарига кўра, қуролли гуруҳларнинг ўзи бу муддатни 2027-йил охиригача чўзишни сўрамоқда.
Аввалроқ ёз ойларида аз-Заидий қуролли гуруҳлар 30-сентябрга қадар — АҚШнинг сўнгги ҳарбийлари Ироқни тарк этиши керак бўлган кунгача қуролсизлантирилишини айтган эди. Қуролли гуруҳлар бу муддатни дарҳол рад этган. Шундан сўнг Ироқ расмийлари ўз баёнотини қайтариб олиб, 30-сентябр куни қуролсизлантириш жараёни якунланишини эмас, балки бошланишини билдирган.
Шундан бери аз-Заидий ҳукумати қуролли гуруҳлар билан шартларни муҳокама қилиш учун алоҳида қўмита тузди. Бош вазирнинг сўзларига кўра, келишилган жадвал 30-сентябр куни расман эълон қилиниши кутилмоқда.
“Бу ихтиёрий масала эмас. Бу заруратдир. Илгари бу ҳақда гапирганлар кейинчалик ўз сўзидан қайтган эди. Улар босимга ёки бошқа хавотирларга таслим бўлган. Мен учун эса бу масала коррупсия каби ор-номус масаласидир”, деди бош вазир.
“Мустаҳкам иқтисодиётни барпо этиш учун аввало қурол назорат остига олиниши керак”, дея қўшимча қилди у.
Ушбу режа Трамп маъмурияти Бағдодга катта ҳарбий ва сиёсий таъсирга эга бўлган Эрон билан алоқадор гуруҳларни жиловлаш бўйича босим ўтказаётган бир пайтда пайдо бўлди.
Теҳрон АҚШ билан қарама-қаршиликда ўзига иттифоқчи бўлган ушбу қуролли гуруҳларга таянади. Улар қўшни Кувайт ва Иорданияга, шунингдек, Ироқдаги энергетика обьектларига ҳамда АҚШнинг Бағдоддаги элчихонасига бир неча бор зарба берган.
Сентябр ойида Саудия Арабистони Ироқ ҳудудидан амалга оширилган бир қатор дрон ҳужумлари қиролликнинг “Шарқ—Ғарб” нефт қувурига шикаст етказганини маълум қилди. Глобал нефт етказиб беришнинг 4 фоизини таъминлайдиган бу қувурга қилинган ҳужум қиролликни стратегик обьектни вақтинча тўхтатишга мажбур қилганди.
Аз-Заидий лавозимга тайинланганидан бери биринчи марта Ню Ёркда БМТ Бош Ассамблеясида иштирок этмоқда. 21-сентябр куни у саммит доирасида АҚШ давлат котиби Марко Рубио билан учрашув ўтказди.