Эрон ёнилғи ташувчи кемалар учун 10 фоизлик тўловни вақтинча бекор қилди

**Эрон ёнилғи ташувчи кемалар учун 10 фоизлик тўловни вақтинча бекор қилди**

Эрон хорижий кемалар учун нефт ва газ ташишга оид 10 фоизлик йиғимни вақтинча бекор қилди. Бу қарор мамлакатдан олиб чиқиладиган ёки олиб кириладиган нефт, газ ҳамда суюқ ёнилғи маҳсулотларини ташувчи кемаларга тегишли.

АҚШнинг денгиз блокадаси туфайли Эроннинг денгиз орқали нефт экспорти жараёни жиддий издан чиққан эди. Фарс нашри хабарига кўра, президентнинг ҳуқуқий масалалар бўйича ўринбосари ушбу йиғимни вақтинча тўхтатиш ҳақида топшириқ берган. Чеклов ҳукумат мазкур йиғим қўлланадиган маҳсулотлар рўйхатини тасдиқлаб, эълон қилгунига қадар амал қилади.

Агентлик маълумотига кўра, 10 фоизлик тўлов нефт, газ ва суюқ маҳсулотларни ташиш харажатларини ошириб юборган эди. Йиғимнинг бекор қилиниши транспорт харажатларини камайтиради. Бундан ташқари, бу хорижий кемаларни Эронга юк олиб кириш ва у ердан юк олиб чиқишга ундайди.

Июн ойида АҚШ президенти Доналд Трамп Ҳормуз бўғозидан ўтиш учун тўлов ундирилиши мумкинлигини айтган эди. Оқ уй раҳбари буни Эрон билан келишув муваффақияцизликка учраса амалга оширишини билдирган.

“60 кунлик ўт очишни тўхтатиш даврида Ҳормуз бўғозида ҳеч қандай тўлов ундирилмайди. Агар келишув тўлиқ якунига етказилмаса, ўтган, ҳозирги ва келажакдаги харажатларни қоплаш мақсадида Яқин Шарқ мамлакатларига “ҳимоячи фаришта” сифатида кўрсатилган хизматлар учун АҚШ томонидан ва унинг манфаатлари йўлида жорий этилиши мумкин бўлган йиғимлардан ташқари, ушбу 60 кунлик муддат тугаганидан кейин ҳам ҳеч қандай тўлов бўлмайди”, деб ёзганди Трамп ўшанда Трутҳ Сосиал тармоғида.

Июл ойида эса АҚШ президенти Ҳормуздан ўтадиган кемалардан 20 фоизлик солиқ олиш фикридан қайтган эди. У Яқин Шарқ етакчилари билан ўтказилган музокаралардан сўнг бу ғоядан воз кечганди. Форс кўрфази давлатлари бож тўлаш ўрнига Вашингтон билан инвестиция шартномаларини имзолаши режалаштирилганди.