Дунёда ҳайдаладиган ерлар энг кўп бўлган 15 давлат маълум қилинди
Ҳиндистон дунёда энг катта ҳайдаладиган ер майдонига эга давлат сифатида қайд этилди. Мамлакатда бундай ерлар қарийб 154 млн гектарни ташкил этади. Кейинги ўринларни АҚШ, Россия ва Хитой эгаллаган.
Дунёда энг кўп ҳайдаладиган ерларга эга бўлган 15 та давлат аниқланди.
Бирлашган Миллатлар Ташкилотининг Озиқ-овқат ва қишлоқ хўжалиги ташкилоти (ФАО) маълумотларига асосланиб, ҳайдаладиган ерлар майдони бўйича энг йирик давлатлар рейтинги тузилди.
Унга кўра, Ҳиндистон қарийб 154 миллион гектар ер билан биринчи ўринни эгаллади. Қўшма Штатларда ҳайдаладиган ерлар майдони тахминан 152 миллион гектарни ташкил этиб, мамлакат рейтингда иккинчи ўринни банд қилди.
Россия 122 миллион гектар билан учинчи, Хитой эса 108 миллион гектар билан тўртинчи ўринни эгаллади.
Кейинги ўринларда Бразилия 55,6 миллион гектар, Аргентина 40,4 миллион гектар ва Канада 38,2 миллион гектар кўрсаткич билан қайд этилди.
Нигерияда ҳайдаладиган ерлар майдони 36,9 миллион гектарни ташкил этади. Украинада бу кўрсаткич 32,9 миллион гектар, Австралияда эса қарийб 31 миллион гектарга тенг.
Рейтингнинг кучли ўн бешталигига Покистон, Қозоғистон, Судан, Мексика ва Индонезия ҳам кирди. Уларда ҳайдаладиган ерлар майдони Покистондаги қарийб 30 миллион гектардан Индонезиядаги 17,8 миллион гектаргача бўлган оралиқни ташкил этади.
ФАО таърифига кўра, ҳайдаладиган ерлар қаторига вақтинчалик қишлоқ хўжалиги экинлари етиштириладиган майдонлар, вақтинчалик ўтлоқ ва яйловлар, шунингдек, вақтинча шудгор ҳолатида қолдирилган ерлар киради.
Кўп йиллик экинлар етиштириладиган майдонлар ва доимий яйловлар эса ушбу кўрсаткичга киритилмайди.