Дунёдаги энг «яшил» 15 давлат рейтинги тузилди
2025-йил якунлари бўйича ўрмон майдони энг катта бўлган давлатлар рейтингида Россия етакчилик қилди. Мамлакатда 832,6 млн гектар ўрмон мавжуд. Кейинги ўринларни Бразилия ва Канада эгаллаган. Дунёдаги барча ўрмонларнинг ярмидан кўпи эса бешта давлат ҳиссасига тўғри келади.
Дунёдаги энг "яшил" 15 давлат рўйхати тузилди. Оур Ворлд ин Дата платформаси БМТнинг Озиқ-овқат ва қишлоқ хўжалиги ташкилоти (ФАО) маълумотларига асосланиб, 2025-йилга келиб ўрмон майдони энг катта бўлган давлатлар кўрсаткичларини эълон қилди.
Ушбу маълумотларга кўра, Россия 832,6 миллион гектар ўрмон майдони билан дунёда биринчи ўринни эгаллади. Бу кўрсаткич сайёрадаги умумий ўрмон майдонининг қарийб бешдан бир қисмини, яъни 20,1 фоизини ташкил этади.
Иккинчи ўринда Бразилия жойлашган бўлиб, унинг ўрмон майдони 486,1 миллион гектарни ташкил этади. Канада эса 368,8 миллион гектар ўрмонга эга.
Кейинги ўринларни АҚШ (308,9 миллион гектар) ва Хитой (227,2 миллион гектар) эгаллаган.
Шунингдек, энг йирик ўрмон майдонига эга давлатлар қаторига қуйидагилар киради: Конго Демократик Республикаси (139,2 миллион гектар), Австралия (133,6 миллион гектар), Индонезия (96 миллион гектар), Ҳиндистон (72,7 миллион гектар) ва Перу (67,2 миллион гектар).
Рўйхатнинг кейинги поғоналарида Мексика (66,3 миллион гектар), Ангола (63,3 миллион гектар), Колумбия (59,5 миллион гектар), Боливия (54,4 миллион гектар) ва Венесуела (47,1 миллион гектар) жойлашган.
Россиянинг ўрмон майдонининг улканлиги мамлакатнинг географик жойлашуви билан боғлиқ. Унинг катта қисми Сибир бўйлаб чўзилган улкан бореал, яъни тайга ўрмонларидан иборат.
ФАО маълумотларига кўра, дунёдаги ўрмонларнинг умумий майдони 4 миллиард гектардан ошади ва улар сайёра қуруқлик майдонининг 32 фоизини қамраб олади. Россия, Бразилия, Канада, АҚШ ва Хитойнинг ўзига дунё ўрмонларининг ярмидан кўпи тўғри келади.