Дунёдаги энг фаровон давлатлар рейтинги эълон қилинди
Британиянинг Тҳе Легатум Институте таҳлил маркази томонидан тузилган навбатдаги «Фаровонлик индекси» (Просперитй Индех) эълон қилинди. Унга кўра, Швейцария дунёдаги энг фаровон мамлакат деб топилди. Бу йилги рейтинг жами 161 давлатни қамраб олган.
Дунёдаги энг фаровон мамлакатлар рўйхати эълон қилинди.
Таҳлил маркази ушбу рейтингни тузишда қарийб 300 та статистик маълумотдан фойдаланган. Баҳолаш жараёнида давлат бошқаруви ва жамоат институтларининг сифати, иқтисодий муҳит, тадбиркорлик учун яратилган шароитлар, шунингдек, таълим, соғлиқни сақлаш ва инсон салоҳиятини ривожлантириш имкониятлари инобатга олинган.
Рейтингда Швейцария биринчи ўринни эгаллади. Бу мамлакат сўнгги йилларда мунтазам равишда биринчи ёки иккинчи поғонадан жой олиб келмоқда. Иккинчи ва учинчи ўринларни мос равишда Норвегия ва Ирландия банд этди. Норвегия ҳам доимий равишда энг фаровон давлатлар қаторида бўлса, Ирландия 2021-йилда еттинчи ўринга тушиб кетганидан сўнг яна юқори ўринларга қайтди.
Энг фаровон ўнталикка Европадан ташқари фақат Австралия киритилган бўлиб, у тўққизинчи ўринни эгаллаган. Рейтингнинг қуйи қисмида асосан Африка давлатлари жойлашган, сўнгги ўнталикда Афғонистон ҳам мавжуд.
Охирги ўринни Эритрея эгаллади. Бу мамлакат узоқ йиллардан буён энг кам фаровон давлатлар қаторидан жой олиб келмоқда. Унинг энг яхши натижаси 2023-йилда қайд этилган бўлиб, ўшанда 156-ўринни эгаллаган. Шунингдек, Нигер ва Чад ҳам рейтингнинг энг қуйи поғоналарида жойлашган.
Россия рейтингда 103-ўринни эгаллаб, Туркия ва Танзания ўртасидан жой олган. Мамлакатнинг энг яхши натижаси 2018-йилда кузатилган бўлиб, ўшанда у 82-ўринга кўтарилган.
Собиқ иттифоқ давлатлари орасида энг юқори кўрсаткич Эстонияга тегишли бўлиб, у 19-ўринни қайд этган. Литва 25-ўрин, Латвия 30-ўрин, Гуржистон 42-ўрин ва Арманистон 43-ўриндан жой олган. Қозоғистон 66-ўринни эгаллаган бўлса, Озарбойжон 105-ўринда, Беларус эса 132-поғонадан ўрин олган.