«Бурж Халифа»нинг бўлажак рақиби: Жидда минораси 474 метрга етди
Саудия Арабистонида қурилаётган Жидда минорасининг баландлиги 474 метрга, қаватлари сони эса 118 тага етди. Қурилиш тугалланмаган бўлса-да, иншоот баландлиги бўйича дунёдаги энг баланд 15 бино қаторига киргани хабар қилинмоқда.
«Бурж Халифа»га бўлажак рақиб: Жидда минораси 474 метрга чиқди
Жеддаҳ Товер, шунингдек ЖЕС Товер ва Кингдом Товер номлари билан ҳам танилган осмонўпар бино қуриб битказилгач, дунёдаги энг баланд иншоот бўлиши кутилмоқда. Унинг якуний аниқ баландлиги ошкор этилмаган, аммо 1000 метрдан ошиши айтилган. Бу ҳозирги эришилган баландликдан икки баравардан ҳам кўпроқдир.
Агар лойиҳа амалга ошса, Жидда минораси Дубайдаги «Бурж Халифа» рекордини янгилайди.
Минорани осмонўпар биноларни лойиҳалашга ихтисослашган АС+ГГ архитектура бюроси ишлаб чиққан. Унинг асосчилари — Эдриан Смит ва Гордон Гилл. Смит аввал Скидморе, Овингс & Меррилл компаниясида ишлаган пайтда «Бурж Халифа»ни лойиҳалашда ҳам иштирок этган.
Жидда минораси аллақачон АҚШдаги иккинчи энг баланд бино — Ню-Ёркдаги Сентрал Парк Товеръдан бироз баландроқ. Ушбу осмонўпар бино ҳам АС+ГГ томонидан лойиҳалаштирилган.
Жидда минорасига 59 та лифт ўрнатиш режалаштирилган. Бино ичида ҳашаматли меҳмонхона, офислар, кенг апартаментлар ва сайёҳлик обьектлари жойлашади. Шунингдек, дунёдаги энг баланд томоша майдончасини қуриш ҳам кўзда тутилган.
Минора Саудия Арабистонининг Жидда порт шаҳрида бунёд этилаётган янги шаҳар ҳудудининг марказий иншооти бўлади. Лойиҳани Кингдом Ҳолдинг компанияси амалга оширмоқда.
Қурилиш 2013-йилда бошланган, бироқ кейинчалик ишлар 60-қават даражасида тўхтаб қолиб, бир неча йилга чўзилган танаффус юзага келган. Ўша даврдаги нашрлар кечикишларни, жумладан, қиролликдаги сиёсий жараёнлар ва валиаҳд шаҳзода Муҳаммад бин Салмон бошлаган тозалашлар билан боғлаган.
Ҳозир қурилиш қайта давом этмоқда. Минора Саудия Арабистонининг айрим бошқа мегалойиҳалари, жумладан, Мукааб кубсимон осмонўпар биноси ва Тҳе Лине — «Кўзгулар чизиғи» шаҳри жиддий қийинчиликларга дуч келаётган бир пайтда қад ростламоқда.
Жидда минорасини қуриб битказиш 2028-йил охирига режалаштирилган.