«Бурж Халифа»дан икки баравар баланд: Саудияда 2 километрлик минора режалаштирилмоқда
Саудия Арабистони Ар-Риёд шимолида баландлиги икки километр бўлган осмонўпар бино қуриш лойиҳаси учун пудратчилар бозорини ўрганишни бошлади. Режа амалга ошса, минора Дубайдаги 828 метрлик «Бурж Халифа»дан икки баравардан ҳам баланд бўлади.
«Бурж Халифа»дан икки баравар баланд: Саудияда 2 километрлик минора режалаштирилмоқда
МЕЕД нашрининг ёзишича, Саудия Арабистони Давлат инвестиция жамғармаси — ПИФ ушбу лойиҳа бўйича қурилиш компанияларига мурожаат қилган. Жараённи жамғарманинг шўба корхонаси — Товер Дистрист Реал Эстате Девелопмент Сомпанй олиб бормоқда.
Бозорни ўрганиш босқичига тажрибали халқаро пудратчилар ҳамда Саудиянинг бир қатор йирик қурилиш компаниялари жалб этилган. Ушбу босқич эҳтимолий ижрочиларнинг имкониятлари ва лойиҳага қизиқишини аниқлашга қаратилган.
Икки километрлик минора Ар-Риёд чеккасида барпо этилиши режалаштирилаётган янги марказий ишбилармонлик ҳудудининг асосий иншооти бўлади.
ПИФ 2025-йил июн ойида мазкур ҳудуд бўйича лойиҳани бошқариш ва маслаҳат хизматларини кўрсатишга қизиққан компаниялардан таклифлар қабул қилган. Бу шартнома минора қурилишини ҳам, унинг атрофидаги ишбилармонлик ҳудудини яратиш жараёнини ҳам бошқаришни ўз ичига олади.
Хабарга кўра, ушбу хизматлар бўйича тендерда қатнашиш учун АҚШнинг Аесом, Жасобс, Парсонс ва Турнер, шунингдек, Британиянинг Масе компанияларига таклиф юборилган.
Лойиҳа меъмори сифатида Британиянинг Фостер & Партнерс бюроси танланган. Бюро 2022-йил охирида эълон қилинган халқаро танловда ғолиб чиққан.
Режалаштирилаётган баландлик — 2 минг метр. Бу дунёдаги энг баланд бино ҳисобланган «Бурж Халифа» баландлигидан қарийб 2,4 баравар кўп. Минора Саудиянинг Жидда шаҳрида қурилаётган, баландлиги бир километрдан ошиши кўзда тутилган осмонўпар бинодан ҳам анча баланд бўлиши кутилмоқда.
Минтақада ўта баланд бинолар қурилиши харажатларини аввал баҳолаган пудратчиларнинг ҳисоб-китобларига кўра, икки километрлик минорани барпо этиш тахминан 5 миллиард долларга тушиши мумкин. Якуний қиймат лойиҳанинг тасдиқланадиган ечимларига боғлиқ бўлади.
Минора ва унинг атрофидаги марказий ишбилармонлик ҳудуди Прожест Рисе деб номланган. У Ар-Риёд шимолидаги Нортҳ Поле йирик комплекс қурилиш лойиҳасининг бир қисми ҳисобланади.
Ҳозирча хабарда қурилишни бошлаш ва якунлашнинг аниқ муддатлари келтирилмаган.