Августда мингта режалаштирилган шахсий қабул ўтказилмади

Август ойида мингта режалаштирилган шахсий қабул амалга оширилмаган

Президент Халқ қабулхонаси тизимида 2026-йил август ойида 83 019 та масала бўйича 76 196 та мурожаат рўйхатга олинди.

Мурожаатларнинг 11 114 таси такрорий, 1 593 таси эса жамоавий характерга эга бўлган.

Энг кўп мурожаатлар бола нафақаси бўйича — 4 833 та, алимент масаласида — 4 658 та ва газ баллони бўйича — 2 475 та келиб тушган. Бундан ташқари, ҳуқуқбузарликка оид 1 826 та, бир марталик моддий ёрдам юзасидан 1 765 та, суриштирув ва тергов масалаларида 1 709 та мурожаат қайд этилган.

Иш билан таъминлаш бўйича 1 657 та, уй-жойни таъмирлашга моддий ёрдам бўйича 1 548 та, ички йўлларни таъмирлаш юзасидан 1 528 та ҳамда ижро ҳужжатларига оид 1 234 та мурожаат келиб тушган.

Ташкилотлар орасида энг кўп мурожаат Ижтимоий ҳимоя миллий агентлигига — 12 097 та келиб тушган. Кейинги ўринларда Ички ишлар вазирлиги — 8 258 та, Мажбурий ижро бюроси — 7 966 та, Энергетика вазирлиги — 6 551 та ва Бош прокуратура — 5 498 та қайд этилган.

Шунингдек, Бандлик вазирлигига 4 272 та, Соғлиқни сақлаш вазирлигига 3 934 та, Олий судга 3 070 та, Мактабгача ва мактаб таълими вазирлигига 2 916 та ҳамда Марказий банкка 2 615 та мурожаат келиб тушган.

Шошилинч мурожаатларнинг 638 таси электр узилишлари, 551 таси ичимлик суви, 67 таси эса тез тиббий ёрдам хизмати билан боғлиқ бўлган.

Август ойида 5 666 та шахсий қабул режалаштирилган бўлиб, амалда 4 666 таси ўтказилган. Ўтказилмаган шахсий қабуллар сони Тошкент вилоятида 148 та, Фарғона вилоятида 137 та ва Тошкент шаҳрида 134 тани ташкил этган.

Шунингдек, 4 495 та сайёр қабул режалаштирилган бўлиб, шундан 4 327 таси ўтказилган. Сайёр қабул ўтказмаган ташкилотлар орасида электр тармоқлари корхоналарида 39 та, ободонлаштириш бошқармаларида 36 та ва маҳаллалар бўлимларида 31 та ҳолат қайд этилган.