АҚШда 11 сентябрь террорчилик хуружларида айбланаётганларга яна ўлим жазоси хавф солиши мумкин
АҚШда 11 сентябрдаги терактлар бўйича айбланувчиларга яна ўлим жазоси хавф солиши мумкин
АҚШ Олий суди 2001 йил 11 сентябрдаги терактларда айбланаётганлар билан тузилган ва уларга ўлим жазосидан қочиш имконини берган келишувларни бекор қилиш ҳақидаги қарорни қайта кўриб чиқишни рад этди. Эндиликда, агар суд уларни айбдор деб топса, иш бўйича уч нафар айбланувчига яна олий жазо тайинланиши мумкин.
Гап Америка расмийлари томонидан терактлар ташкилотчиси деб ҳисобланадиган Холид Шайх Муҳаммад, шунингдек, Мустафо ал-Ҳавсавий ва Валид бин Атташ ҳақида бормоқда. 2024 йилда улар ўлим жазосидан воз кечиш эвазига айбини тан олиш бўйича келишув тузган эдилар. Бироқ бу келишувлар узоқ давом этмади.
2024 йил август ойида АҚШнинг ўшандаги мудофаа вазири Ллойд Остин республикачи қонун чиқарувчиларнинг танқидлари фонида уларни бекор қилди. Ҳимоя томони вазирнинг келишувларни бекор қилишга ҳаққи йўқлигини айтиб, ушбу қарор устидан шикоят қилди.
2025 йил июль ойида апелляция суди Остин ўз ваколатлари доирасида ҳаракат қилган деган қарорга келди. Айбланувчилар ушбу қарор устидан Олий судга шикоят қилишга уриндилар, аммо у аризаларни кўриб чиқишни рад этди. Шу тариқа, келишувларни бекор қилиш ҳақидаги қарор ўз кучида қолмоқда.
Иш Кубадаги Гуантанамо Америка базасидаги ҳарбий судда кўрилмоқда ва терактлар билан боғлиқ энг узоқ давом этаётган жараёнлардан бири бўлиб қолмоқда. Суд суриштирувини, хусусан, айбланувчилар МРБнинг махфий қамоқхоналарида қийноққа солинганидан кейин олинган далилларнинг мақбуллиги бўйича баҳслар қийинлаштирмоқда.
Суд жараёнининг бошланиши 2028 йил июнь ойига белгиланган. Айблов ҳукми чиқарилган тақдирда, Муҳаммад, ал-Ҳавсавий ва бин Атташга ўлим жазоси хавф солиши мумкин.
2001 йил 11 сентябрдаги терактлар деярли уч минг кишининг ёстиғини қуритган.